Qyrǵyzstandyq 73 mln teńgeniń taýaryn shekaradan zańsyz ótkizbek boldy
14:45, 26 Qarasha 2021
TALDYQORǴAN. QazAqparat –Almaty oblysynyń keden beketteriniń birinde jalǵan qujat rásimdelip, shekaradan zańsyz shyǵarylǵan taýar tárkilendi, dep habarlaıdy QazAqparat tilshisi.
Qyrǵyz eliniń azamaty balalar jáne sporttyq aıaq kıimderdi «Altynkól-Jol» keden beketi arqyly ótkizip, Qyrǵyzstan Respýblıkasyna jetkizbek bolǵan. Ekonomıkalyq kontrobanda faktisin Qarjy monıtorıngi agenttigi aýmaqtyq departamentiniń qyzmetkerleri anyqtaǵan.
Vedomstvonyń habarlamasyna sáıkes, zańsyz ótkizilmek bolǵan taýardyń jalpy somasy 73 mln teńge. Іlespe qujattarda jalǵan málimet kórsetilip, taýarlar deklaratsııalanbaǵan. Zańbuzýshyǵa 2,2 mln teńge aıyppul salynyp, tárkilengen taýar memleket kirisine aınaldyrylatyn bolady.