Qyrǵyzstandaǵy jaǵdaı: Bishkek meri kelgen shyǵyn kólemin atady

BІShKEK. KABAR – QazAqparat – Bishkek qalasynyń meri Azız Sýrakmatov qalalyq qyzmet jáne qurylymdyq bólimshelermen jıyn ótkizdi, dep habarlaıdy QazAqparat Kabar agenttigine silteme jasap.

Mýnıtsıpalıtettiń baspasóz qyzmetiniń habarlaýynsha, mer barlyq qurylymdyq jáne aımaqtyq bólimsheler kúsheıtilgen rejımde jumys istep jatqanyn atap ótti.

«Qazirgi ýaqytta bolǵan jaǵdaıǵa baılanysty jergilikti bıýdjet tapshylyǵy 1 mlrd 428 mln somdy qurady, al aldyn ala esepteý boıynsha jalpy shyǵyn 17 mln somnan asqan», - delingen habarlamada.

13 avtobýs, 16 patrýldik qyzmet kóligi qıratylyp, Ala-Too alańynda 65 sharshy metr mármár tas urlanǵan, 7 jedel járdem kóligi búlindi.

Sondaı-aq, astanadaǵy epıdemııalyq jaǵdaı týraly vıtse-mer Vıktorııa Mozgacheva da esep berdi. Onyń aıtýynsha, 12 qazanda Bishkek qalasynda 59 koronavırýs juqtyrý oqıǵasy tirkelip, jalpy indetke shaldyqqandar sany 18 493-ke jetken.

Eske salsaq, búgin Qyrǵyzstan prezıdenti Sooronbaı Jeenbekov Bishkek qalasynyń aýmaǵynda tótenshe jaǵdaı rejımin qaıtadan engizý týraly Jarlyqqa qol qoıdy.

4 qazan kúni Qyrǵyzstanda Jogorký Keneshke depýtattardy saılaý ótti. Depýtattyq mandatqa 16 partııa úmitkerlik etti. Daýys berýdiń aldyn ala málimeti boıynshy, 7% mejeni 4 partııa eńserdi.

Al, 5 qazan kúni saılaý nátıjesine kóńili tolmaǵan bir top adam ortalyq alańda mıtıng uıymdastyryp, odan keıin Aq úıge bettedi. Olardy tarqatý úshin mılıtsııa kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boıynsha, aýrýhanaǵa zardap shekken 16 adam jetkizilgen. Keıingi málimet boıynsha, zardap shekken adamdar sany 911-ge jetti.

Eldiń Іshki ister mınıstrligi mıtıngti uıymdastyrýshylar men partııa basshylaryn óz jaqtastaryn úılerine qaıtarýǵa shaqyrdy.