Qyrǵyzstandaǵy qyrǵyz tili Qazaqstandaǵy qazaq tili sııaqty qajetti bolýy tıis - A. Jeenbekov

BІShKEK. QazAqparat - Bishkekte «Zań shyǵarýdaǵy memlekettik til máselesi» atty respýblıkalyq ǵylymı-praktıkalyq konferentsııa ótti.

Eki kúndik forým Jogorký Keneshtiń bastamasymen QR Ulttyq ǵylym akademııasy Sh.Aıtmatov atyndaǵy Til jáne ádebıet ınstıtýtynyń uıymdastyrýymen ótti. Jıynda til týraly zań, qyrǵyz tiliniń orfografııasy, termınologııa, aýdarma salasyndaǵy kúrdeli taqyryptar talqylandy.

«Qyrǵyz tiliniń qaǵaz júzinde ǵana emes, kúndelikti qoldanysta bolýy úshin onyń mártebesi týraly Konstıtýtsııada jazyp qana qoıý azdyq etedi. Qyrǵyz tili zań shyǵarý, resmı qujat aınalymy, aqparat taratý tiline aınalǵan jaǵdaıda ǵana memlekettik mártebege ıe bolady», - dep málimdedi Jogorký Kenesh spıkeri Asylbek Jeenbekov.

Jıynda Jogorký Kenesh spıkeri qyrǵyz tilin kúndelikti qoldanysqa engizýge baǵyttalǵan birqatar sharalar atqarylyp jatqanyn aıttyn. Naqtyraq aıtqanda, 4 jyldan beri parlament sessııasy memlekettik tilde ótip keledi, qujat aınalymy, memorgandar arasynda ózara qarym-qatynas tili de qyrǵyz tili bolýyna nazar aýdarylǵan.

«Bastysy, el halqy qyrǵyz tilinde oılap, sóılep, jaza bastasa, memlekettik til deńgeıi kóterilip, óz qyzmetin oryndaı bastaıdy», dedi Asylbek Jeenbekov. Sondaı-aq spıker qyrǵyz tilin bilý Reseıde orys tili, Qazaqstanda qazaq tili, Ulybrıtanııada aǵylshyn tili sııaqty qajetti bolýy tıis dedi.