Qyrǵyzstanda shekara mańyndaǵy 5 aýyl turǵyndary evakýatsııalanyp jatyr

BІShKEK. Kabar – QazAqparat – Qyrǵyzstannyń Tótenshe jaǵdaılar mınıstrligi Chon-Alaı aýdanynyń shekaralyq aýyldarynan halyqty evakýatsııalap jatyr, dep habarlaıdy QazAqparat Kabar agenttigine silteme jasap.

«Tótenshe jaǵdaılar mınıstri Boobek Ajıkeev Osh oblysynyń Chon-Alaı aýdanyndaǵy jaǵdaıdy tolyq baqylaýynda ustap otyr jáne jergilikti halyqty evakýatsııalaý jumystaryna ózi basshylyq etýde», - dep málim etti vedomstvonyń baspasóz qyzmetinen.

Mınıstrlik aqparatyna sáıkes, saǵat 19.30-daǵy jaǵdaı boıynsha, Osh oblysynyń Chon-Alaı aýdanyna qarasty Kara-Myk, Jekendı, Kara-Teııt, Chýlýk jáne Shıbe aýyldarynan turǵyndar Daroot-Korgon aýylyndaǵy A.Saııt atyndaǵy mektepke kóshirilýde.

Sondaı-aq jergilikti halyq A.Myrzaqulov atyndaǵy orta mektepke, 44-polıtehnıkalyq ýchılışege jáne Ortalyq meshitke ornalastyrylyp jatyr. Evakýatsııaǵa QR Tótenshe jaǵdaılar mınıstrliginiń aýdandyq bólimsheleri, Chon-Alaı aýdanynyń basshylyǵy jáne azamattyq qorǵanys komıssııasy jumyldyryldy.

«Sonymen qatar TJM gýmanıtarlyq kómekti uıymdastyrýǵa kiristi. Evakýatsııa boıynsha barlyq is-shara Tótenshe jaǵdaılar mınıstri B. Ajıkeevtiń jeke basshylyq etýimen jáne jiti baqylaýymen ótkizilýde», - dep jazady Kabar.