Qyrǵyzstanda Qazaqstannyń dinaralyq dıalogti damytýdaǵy róli talqylandy

BІShKEK. QazAqparat – Bishkektegi Abaı Qunanbaev mádenı ortalyǵynda «Adamzattyń rýhanı, áleýmettik damýyndaǵy álemdik jáne dástúrli dinder kóshbasshylarynyń róli» atty baspasóz brıfıngisi ótti. Іs-shara 14-15 qyrkúıek aralyǵynda elimizde bolatyn Álemdik jáne dástúrli dinder kóshbasshylarynyń VII sezine arnalǵan, dep habarlaıdy QazAqparat tilshisi.

Jıynǵa qatysýshylar Qazaqstannyń konfessııaaralyq kelisimdi qoldaýdaǵy róline joǵary baǵa berdi. Sondaı-aq Qyrǵyzstannyń din isteri jónindegi memlekettik komıssııasy dırektorynyń orynbasary Gúlnaz Isaeva eki el arasyndaǵy qarym-qatynasty nyǵaıtý qajettigin atap ótti.

«Biz jaqyn kórshiler retinde eki el arasyndaǵy qarym-qatynasty nyǵaıtýǵa tıispiz. Dinı jáne mádenı yntymaqtastyq, tájirıbe almasýdy qamtıtyn rýhanı sala bizderdi jaqyndastyra túsedi. Konfessııaaralyq dıalog qurý úshin dinı senim bostandyǵyn qamtamasyz etý, dinı bilim berýdi damytý qajet. Bul radıkalızm, ekstremızmniń aldyn alýǵa múmkindik beredi. Qazaqstanda kóptegen ult ókilderi turady. Sondyqtan ulttar arasyndaǵy qarym-qatynasty memlekettik deńgeıde qoldaý, olarmen ashyq dıalog qurý mindeti tur. Biz Qazaqstannyń bul baǵyttaǵy bastamalaryn qoldaımyz», - dedi Gúlnaz Isaeva.

Al Qyrǵyzstandaǵy Halyqaralyq musylman forýmy ókildiginiń jetekshisi Azamat Ismaǵambetov Nur-Sultanda ótetin sezdiń mańyzdylyǵyna toqtaldy. Onyń sózinshe, Qazaqstan atalǵan sharany uıymdastyra otyryp, oryn alǵan máselelerdi sheshýdiń jańa tásilderin usynady.