Qyrǵyzstanda azyq-túlik qymbattady

BІShKEK. QazAqparat - Qyrǵyzstanda osy jyldyń birinshi toqsanynda 2022 jyldyń jeltoqsanymen salystyrǵanda tutyný baǵasy men tarıfter 3,2%-ǵa ósken, dep habarlaıdy QazAqparattyń menshikti tilshisi.

Qyrǵyzstan ulttyq statıstıka komıtetiniń málimetinshe, azyq-túlik pen alkogolsiz sýsyndardyń baǵasy 3,6%, alkogoldik ishimdikter men temeki ónimderiniń baǵasy 4,7%, azyq-túlik emes taýarlardyń baǵasy 2,1%, halyqqa kórsetiletin qyzmetter tarıfi 2,6% qymbattaǵan.

Azyq-túliktiń ishinde baǵasy eń qatty kóterilgen azyq-túlik túrleri mynalar: jańa pisken kókónister - 32,1%, kúrish - 11,4%, balyq - 8,4%, sút ónimderi - 3,8%, alkogolsiz sýsyndar - 3,3%, taýyq jumyrtqasy - 3,2%, makaron ónimderi jáne basqa da astyq ónimderi - 2,6%, pisirilgen ónimder - 1,3% jáne et - 0,8%.

Baǵa men tarıftiń ósýi respýblıkanyń barlyq óńirlerinde baıqalady. Bul rette, eń joǵary ósim Naryn oblysynda (6,1%). Basqa óńirlermen salystyrǵanda munda tamaq ónimderi men alkogolsiz sýsyndar quny 5,9% ósip otyr.