Qyrǵyzstan Úkimetiniń basshysy Alısa men Siri qazaq tilinde sóılemeıtinine alańdaýly

ALMATY. QazAqparat – Qyrǵyzstan Mınıstrler kabınetiniń tóraǵasy – Prezıdent Ákimshiliginiń basshysy Aqylbek Japarov Digital Almaty forýmynyń plenarlyq sessııasynda gadjetterdegi daýystyq kómekshiler qazaq jáne qyrǵyz tilderinde sóılemeıtinine alańdaýshylyq bildirdi, dep habarlaıdy QazAqparat tilshisi.

Almatyda ótip jatqan forýmda Aqylbek Japarov atap ótkendeı, jasandy ıntellekt jańa múmkindikter men perspektıvalar ashady. Sonymen qatar tehnologııanyń damý qarqyny ózgeristerge jol bastaıdy.

«Meni sol Alısa men Siri-diń qyrǵyz nemese qazaq tilderinde sóılemeıtini tolǵandyrady. Tsıfrlyq álemge enbegen tilder jazý tiline enbeı qalǵan tildiń taǵdyryn keshetinin barlyǵymyz túsinip otyrmyz. Jasandy ıntellekt múmkindiktermen qosa, máseleler ákeletinin eskerý mańyzdy. Sondyqtan onyń qoǵamǵa áserin belsendi basqarý qajet», – dedi ol.

Aıta keteıik, búgin túske deıin Eýrazııa ekonomıkalyq odaǵyna múshe elderdiń úkimet basshylary Digital Almaty forýmynyń plenarlyq otyrysyna qatysqan edi.

Olar Govteh sheksiz memlekettik qyzmetter, Fınteh ıaǵnı tranzaktsııalardy ońtaılandyrý, jańa tehnologııalar men ІT-bıznes jaıynda pikir almasyp, tehnoparkterdiń damýyn, korporatıvtik ınnovatsııalardyń trendterin, tsıfrlyq naryqtaǵy derekterdi retteý máselelerin, kreatıvti ındýstrııa máselesin talqylady.