Qyrǵyzstan prezıdenti Ýkraınadaǵy jaǵdaıǵa qatysty málimdeme jasady

BІShKEK. QazAqparat - Ýkraınadaǵy jaǵdaı TMD elderin alańdatpaı qoımaıdy. Qyrǵyzstan prezıdenti Almazbek Atambaev Ýkraınadaǵy oqıǵaǵa baılanysty málimdeme jasady, dep habarlady qyrǵyz memleketi basshysynyń baspasóz qyzmetinen.

A.Atambaev Kıevte qaza tapqan adamdar týraly habardy qyrǵyzstandyqtardyń qabyrǵasy qaıysa qabyldaǵandyǵyn aıtty. «Bul Ýkraına halqy úshin aýyr qasiret. Qaza tapqandardyń týǵan-týystaryna kóńil aıtamyz. Ýkraına halqy birligin saqtaı otyryp, bastan keship otyrǵan problemany sheshedi degen úmittemiz», - degen QR Prezıdentiniń sózin keltiredi baspasóz qyzmeti.

Sondaı-aq Qyrǵyzstan Prezıdenti kezinde óz eliniń de osyndaı synnan ótkenin, búginde halyq el bolashaǵyn óz qolyna alǵanyn atap ótti. «Bul kezeńde el bolashaǵyna jaýap beretindigin jarııalaǵan ýkraınalyq saıasatkerlerdiń moınyna jaýapkershiliktiń aýyr júgi tústi. Olar barsha Ýkraına halqynyń múddelerin nazarǵa alyp, ishki saıası qysymǵa jol bermeýi kerek. Ásirese, etnosaralyq máselede», - dep esepteıdi A.Atambaev.