Qyrǵyzstan men Tájikstan shekarasynda kesheden beri shıelenis júrýde

BІShKEK-DÝShANBE. Kabar – Hovar - QazAqparat – 28 sáýir kúni Qyrǵyzstan men Tájikstan shekarasynda eki el turǵyndary ózara kelispeı, qaqtyǵys bastaldy. Qyrǵyzstannyń 3 aýylynda tótenshe jaǵdaı rejımi engizildi, dep habarlaıdy QazAqparat.

Qyrǵyzstannyń «Kabar» aqparat agenttiginiń jazýynsha, shekaradaǵy kelispeýshilik áli jalǵasýda.

Búgin tańǵy saǵat 05:45-te áskerı bólimge qaraı oq atylǵan. Al Osh-Isfana kúre jolyndaǵy kólikterge aýyl turǵyndary tas laqtyrǵan. Atalǵan fakti Qyrǵyzstan Qylmystyq kodeksiniń 266-baby (buzaqylyq) boıynsha tirkeldi.

Budan bólek, Qyrǵyzstannyń Kók-Tash aýylynyń 30 jastaǵy turǵyny kózine oq jaraqatyn alǵan. Ol aýrýhanaǵa jetkizildi. Bul oqıǵa «Adam óltirýge oqtalý» baby boıynsha tirkeldi.

Quqyq qorǵaýshylar janjal ornynda kúsheıtilgen qyzmet atqarýda.

Qyrǵyzstan Batken aýdanynyń úsh aýylynda tótenshe jaǵdaı rejımin engizdi.

«Kabar» aqparatyna súıensek, búgin Qyrǵyzstannyń Batken oblysynyń basshysy Ómirbek Sývanalıev pen Tájikstannyń Sogdııskaıa oblysynyń basshysy Radjabb Ahmadzoda shekaradaǵy jaǵdaı boıynsha kelissózdi bastady.

Al Tájikstannyń «Hovar» agenttiginiń habarlaýynsha, 28 sáýir kúni saǵat 16:00-de Isfara qalasy mańyndaǵy Hodjaı Alo aýyly qasynda ornalasqan «Golovnoı» sý taratýshy pýnkte Tájikstan men Qyrǵyzstan shekarasyndaǵy aýyl turǵyndary kelispeı qalǵan.

Eki jaq bir-birine tas laqtyrǵan. Saldarynan Tájikstannyń 7 azamaty túrli dárejedegi dene jaraqatyn aldy.