Qyrǵyzstan men Tájikstan saǵat 20:00-den bastap atysty toqtatý týraly kelisimge keldi

BІShKEK. QazAqparat – 2021 jyldyń 28-29 sáýiri aralyǵynda qyrǵyz-tájik shekarasynda bolǵan jaǵdaıǵa baılanysty Qyrǵyzstannyń Syrtqy ister mınıstri Rýslan Qazaqbaev Tájikstan Syrtqy ister mınıstri Sırodjıddın Mýhrıddımen kelissóz júrgizdi, dep habarlaıdy QazAqparat Qyrǵyzstannyń Kabar agentttigine silteme jasap.

Kelissóz barysynda taraptar eki eldiń shekarasynda bolǵan jaǵdaıdy retteýge qatysty birlesken qımyldardy talqylady.

Qyrǵyzstan Syrtqy ister mınıstrliginiń habarlaýynsha, eki eldiń syrtqy ister vedomstvolarynyń ókilderi eki taraptan da kisi ólip, adamdardyń jaraqattanýyna alyp kelgen shıelenisti jaǵdaıdy saıası dıplomatııalyq quraldardy qoldana otyryp, beıbit túrde retteý kerektigin atap ótti.

Mınıstr R.Qazaqbaev qyrǵyz tarapynyń ózge eldiń jerine kóz tigip otyrmaǵanyn jáne óz eliniń jerin de eshkimmen bólispeıtinin atap ótti. Osy rette ol shekaradaǵy barlyq sharýashylyq máseleler qyrǵyz-tájik shekarasyn delımıtatsııalaý men demarkatsııalaý jónindegi úkimet delegatsııalary aıasyndaǵy joǵary ókilderdiń qatysýymen kelissózder barysynda sheshilýi qajettigine nazar aýdardy.

Sondaı-aq ol eki el arasyndaǵy senimdi ásirese shekaraǵa jaqyn jerde nyǵaıtyp, shekaralas aýdandarda qaýipsizdik pen turaqtylyqty qamtamasyz etýmen baılanysty sharalardy qolǵa alý kerektigine nazar aýdaryp, jergilikti halyqtardyń arasyndaǵy shıelenisti qozdyrýǵa degen kez kelgen umtylystyń jolyn kesý kerektigin aıtty.

Birneshe kólissózderdiń barysynda QR men TR arasynda saǵat 20:00-den bastap, atysty tolyq toqtatý jáne áskerdi aımaqtan alyp ketý týraly kelisim jasaldy.

Sonymen qatar taraptar jaqyn arada eki taraptyń jergilikti atqarýshy organdary ókilderiniń qatysýymen quqyq qorǵaý jáne kúsh-qýat qurylymdary basshylarynyń bólek kezdesýin uıymdastyrý jóninde kelisti. Basqosýda shekarada qalyptasqan jaǵdaıdy retteýdiń ózge de jáıttary sóz bolady.

Jaǵdaıdy retteýdiń odan ári sharlary retinde taraptar ózara aqparattyq-túsindirý jumystaryn kúsheıtýge kelisti.

R.Qazaqbaev pen S.Mýhrıddın eki tarapty da arazdastyrýshy kúshterdiń qıturqy áreketterine berilmeýge shaqyrdy.