Qyrǵyzstan men QHR-dyń ózara saýda-sattyǵyna qatysty málimetter sáıkes kelmeıdi - Saǵyntaev

ASTANA. QazAqparat - Qazaqstan Respýblıkasynyń Premer-Mınıstri Baqytjan Saǵyntaev Erevandaǵy Eýrazııalyq úkimetaralyq keńestiń keńeıtilgen otyrysynda 2015-2017 jyldar boıynsha QHR men Qyrǵyzstan ózara saýda-sattyǵynyń kedendik statıstıka málimetterinde eleýli aıyrmashylyqtyń baryn málim etti, dep habarlaıdy «QazAqparat» HAA tilshisi.

«Qytaı tarapynyń syrtqy saýdaǵa qatysty statıstıka málimetine súıensek, Qytaıdan Qyrǵyzstanǵa 2015 jyly 4,3 mlrd AQSh dollarynyń taýary ekporttalǵan. Al Qyrǵyzstannyń statıstıkalyq málimeti Qytaıdan kelgen ımporttyń mólsherin 1 mlrd AQSh dollaryna teń dep otyr. Aıyrmashyshylyq - 3,3 mlrd AQSh dollary. 2016 jyly Qytaıdyń málimeti boıynsha eksport 5,6 mlrd AQSh dollaryn kórsetse, qyrǵyz tarapy ımporttyń mólsherin 1,5 mlrd AQSh dollary degen málimetti keltiredi. Aıyrmashylyq, ózderińiz kórip otyrǵandaı, 4,1 mlrd AQSh dollary», - deıdi QR Premer-Mınıstri.

Baqytjan Saǵyntaev óz sózinde tek Qytaımen ǵana emes, qyrǵyz tarapynyń málimetteri Qazaqstanmen de qarama-qaıshy ekenin atap ótti.

Eske sala keteıik, búgin Erevanda ótken Eýrazııalyq úkimetaralyq keńestiń otyrysyna Qazaqstan, Armenııa, Qyrǵyzstan, Reseı jáne Belarýs elderiniń úkimet basshylary qatysqan bolatyn .

Foto: primeminister.kz