Qyrǵyzstan memlekettik qyzmet kórsetýdiń qazaqstandyq tájirıbesimen tanysty

ALMATY. QazAqparat - Almatyǵa memlekettik qyzmet kórsetýdiń qazaqstandyq modelin zerttep, tájirıbe almasý maqsatynda Qyrǵyzstan delegatsııasy keldi, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy tóraǵasynyń orynbasary Birjan Júnisov qyrǵyzstandyq áriptesterine front-ofısterde qujattardy qabyldaýdan bastap áleýmettik tólemderdi taǵaıyndaýǵa deıingi úderisterdi kórsetti.

Sondaı-aq qonaqtarǵa elektrondy, proaktıvti jáne kompozıttik formatta memlekettik qyzmet kórsetýdiń jańa formattaryn tanystyrdy.

Aıta ketý kerek, Qazaqstan TMD-da birinshi bolyp memlekettik qyzmetterdi proaktıvti tásilmen kórsetýdi engizdi.

Kezdesý barysynda delegatsııa músheleri memlekettik korporatsııanyń front/bek-ofısteriniń jáne zeınetaqy men járdemaqy taǵaıyndaý jónindegi ýákiletti organnyń qurylymdyq bólimsheleriniń qyzmetimen tanysty, egov.kz elektrondyq úkimet portalynyń jumysyn kórip, sondaı-aq, TelegramBot messendjeri jáne eGov-mobile mobıldi qosymshasy arqyly memlekettik qyzmetterdi onlaın alýǵa múmkindik beretin servısterdi kórdi.

Delegattar memlekettik qyzmet kórsetýdi uıymdastyrý kezinde erekshe qajettiligi bar adamdardǵa úlken kóńil bólinetinin atap ótti.

Halyqqa qyzmet kórsetý ortalyqtary pandýstarmen, shaqyrý batyrmalarymen, Braıl mátini bar taqtaıshalarmen, nashar kóretinderge arnalǵan taktıldi joldarmen jabdyqtalǵan, atalǵan toptaǵy azamattarǵa yńǵaıly bolý úshin yńǵaıly bolý úshin «jeńildik terezeleri» qarastyrylǵan.

Sondaı-aq I jáne II toptaǵy múgedekterdiń memlekettik qyzmetterdi HQO-ǵa barmaı-aq, 1414 baılanys ortalyǵyna ótinim bere otyryp, mamandardy úıge shaqyrtý múmkindigi bar.

Aıta keteıik, qazaqstandyqtar 1414 baılanys ortalyǵynda zeınetaqy men járdemaqy taǵaıyndaýǵa da qatysty barlyq máseleler boıynsha keńes ala alady.

«Sizder azamattardyń jaǵdaıy men qyzmetke qoljetimdiligin arttyrý tetigin jaqsy oılastyrypsyzdar. Qazaqstan 5 jyl ishinde úlken jetistikterge qol jetkizip, memlekettik qyzmetterdi klıentter úshin barynsha yńǵaılaý jáne tsıfrlandyrý boıynsha kórshi elderdegi áriptesterinen oq boıy ozyp tur. Bizdiń kezdesýimizdiń nátıjesi boıynsha, áriptesterimmen birge óz elimizde memlekettik qyzmet kórsetýdiń qazaqstandyq ádisterin, protsesterin paıdalanýǵa nıettimiz», – deıdi Qyrǵyzstan Respýblıkasynyń áleýmettik qorynyń tóraǵasy Jánibek Orozalıev.

Buǵan deıin áleýmettik salada qyzmet kórsetý tájirıbesimen tanysý aıasynda Qazaqstanǵa Mońǵolııa, Grýzııa delegattary kelgen bolatyn.