Qyrǵyzstan 16 jyldan beri birinshi ret júkti áıelderge beriletin járdemaqyny ósirmek
Atalǵan zań jobasyn Eńbek, áleýmettik qamsyzdandyrý jáne kóshi-qon mınıstrligi qoǵamdyq talqylaýǵa shyǵardy.
Negizdeme anyqtamasyna sáıkes, 11-shi jumys kúninen bastap júktilik jáne bosaný boıynsha járdemaqy mólsherin esepteý úshin qoldanylatyn eseptik kórsetkish 2006 jyly 10 eseptik kórsetkish (1000 som) mólsherinde belgilendi, ol 16 jyl boıy óspegen.
Búgingi tańda júktilik jáne bala týýyna baılanysty beriletin járdemaqynyń ortasha mólsheri eńbekke qabiletti halyqtyń eń tómengi kúnkóris deńgeıine sáıkes kelmeıdi, ol 2022 jyldyń ІІІ toqsanynyń qorytyndysy boıynsha 8100 somdy quraıdy.
Joba joǵaryda aıtylǵandardy negizge ala otyryp, taýarlar men qyzmetter baǵasynyń qarqyndy ósýin eskere kele, áıelderdi áleýmettik qoldaý maqsatynda 2023 jylǵy 1 sáýirden keıin 11 jumys kúninen bastap aıyna 10-nan 20 eseptik kórsetkishke deıin júktilik jáne bosaný boıynsha járdemaqy mólsherin arttyrýdy kózdeıdi.
Osy jobamen qatar on birinshi jumys kúninen bastap eńbekke ýaqytsha jaramsyzdyq boıynsha járdemaqy kólemin aıyna 50-den 100 eseptik kórsetkishke deıin arttyrý josparlanyp otyr.
Aıta keterligi, júktilik jáne bosanýy boıynsha járdemaqy taǵaıyndaý tártibi týraly erejege sáıkes, qyzmetker naýqastanǵan jaǵdaıda eńbekke ýaqytsha jaramsyzdyq boıynsha járdemaqy tolyǵymen jumys berýshiniń óz qarajaty esebinen tólenedi. Bul rette alǵashqy on jumys kúni úshin eńbekke ýaqytsha jaramsyzdyq járdemaqysy ortasha aılyq jalaqy mólsherinde, al on birinshi jumys kúninen bastap aıyna 50 eseptik kórsetkish (5000 som) mólsherinde tólenedi.
COVID-19 pandemııasy kezinde dári-dármektiń baǵasy ósip, uzaq ýaqyt boıy aýyryp, tabyssyz qalǵan qyzmetkerler aıyna 5000 som járdemaqymen qıyn jaǵdaıǵa tap boldy.
Osyǵan baılanysty eńbekke ýaqytsha jaramsyzdyq boıynsha beriletin járdemaqy kólemin aıyna 5000 somnan 10000 somǵa deıin kóterý usynylyp otyr.
Foto: sites.wp.odu.edu