Qyrǵyzdar aq qalpaqty qorlaǵandarǵa aıyppul salýdy qarastyrýda

BІShKEK. QazAqparat - Qyrǵyzstanda qyrǵyz ultynyń aq qalpaǵyna nuqsan keltirgenderge aıyppul salý qarastyrylýda. Jogorký Kenesh depýtattary qazir osyndaı talaptardy qarastyratyn zań jobasyn halyq talqysyna usynyp otyr, dep habarlaıdy Qyrǵyzstannyń «Kabar» agenttigi.

Agenttik málimetterine qaraǵanda, 2018 jyldyń 30 qazanynda qoǵamdyq talqylaýǵa QR «Zań buzýshylyqtar týraly» Kodeksine engiziletin ózgerister usynylmaq.

Buǵan Qyrǵyzstannyń Jogorký Keneshiniń depýtaty Ekmat Baıpakpaev bastamashy bolǵan.

Zańdy túsindirý anyqtamasynda qujattyń «Ulttyq bas kıim Aq qalpaqqa mádenıet sımvoly mártebesin berý týraly» zań jobasyn daıyndaý barysynda qolǵa alynǵany aıtylady. Atalmysh qujat talaptaryna sáıkes, endigári qyrǵyzdardyń aq qalpaǵyn qorlaǵandarǵa arnaıy zań normasyna sáıkes aıyppul salynady.

«Ulttyq bas kıim Aq qalpaqqa mádenıet sımvoly mártebesin berý týraly» zań jobasy qyrǵyz halqynyń ulttyq murasynyń mańyzdy elementteriniń biri - aq qalpaqtyń ımıdjin ońaltýǵa, ony qorǵaýdyń quqyqtyq bazasyn bekitýge, damytý men qoldaýǵa, nasıhattaýǵa baǵyttalǵan.

Zań jobasy sonymen qatar Qyrǵyz Respýblıkasy men Qyrǵyzstan halqyn olardyń tarıhı murasy men aq qalpaqty kıip júrý mádenıeti arqyly barynsha tanytýǵa baǵyttalǵan.

Zań jobasyna Qyrǵyzstannyń Zańbuzýshylyqtar týraly kodeksine 65,2 baby engiziledi. Oǵan sáıkes, aq qalpaqty qorlaǵandarǵa 1 dárejede (jeke tulǵalar úshin 10 eseptik kórsetkish, zańdy tulǵalarǵa 50 eseptik kórsetkish) aıyppul salynady.

Atalmysh zań talaptarynyń buzylýyn anyqtaý jergilikti ózin-ózi atqarýshy organdardyń quzyryna beriledi. Zań jobasy Qyrǵyzstan Konstıtýtsııasynyń normalaryna sáıkes keledi jáne onyń quqyqtyq, genderlik, ekologııalyq, ekonomıkalyq, sybaılas jemqorlyq baǵyttary boıynsha eshqandaı saldary bolmaıdy.