Qyrǵyz tarapynan EAEO sotyna eshqandaı shaǵym túsken joq - EAEO sotynyń sýdıasy

ASTANA. QazAqparat - Eýrazııalyq ekonomıkalyq sotynyń sýdıasy Venera Seıtımova Qazaqstan men Qyrǵyzstan memleketteriniń shekarasyndaǵy kedendik baqylaýǵa qatysty týyndaǵan másele boıynsha pikirin bildirip, «QazAqparat»HAA tilshisiniń saýaldaryna jaýap berdi.

«Eń aldymen, Eýrazııalyq ekonomıkalyq sottyń quzireti qandaı ekenin bilgen durys. Eger bul máselede saıası sıpat bolsa, biz aralaspaımyz. Al eger ekonomıkalyq odaqtyń kelisiminde qaralǵan erejelerdiń buzylýyna baılanysty bir memlekettiń ekinshi memlekettiń aldyna kese-kóldeneń tartqan máselesi bolsa, álbette aralasamyz. Ótinim túsirse túsirsin, sot qaraıtyn bolady», - deıdi ol.

Venera Seıtımovanyń aıtýynsha, atalǵan sotta qazirgi ýaqytta Qazaqstan men Qyrǵyzstan arasyndaǵy memleketaralyq daý joq.

«Esh taraptan eshqandaı ótinim nemese shaǵym túspegendikten, tipti sotqa deıingi de eshqandaı málimettiń joqtyǵyn aıtqymyz keledi. Al BAQ ártarapta aqparat beretinin bilesiz. Demek, ondaǵy aqparat eshteńeni bildirmeıdi. Basqa jaǵdaıda bári sotta anyqtalady dep jaýap berer edik. Memleketter keıbir máselelerdi ózara sheship alýyna da bolatynyn jańa da aıtyp óttik», - deıdi ol.

EAEO sotynyń sýdıasy qazirgi ýaqytta esh taraptan eshqandaı shaǵym túspegenin eske saldy.

«BAQ-ta jarııalanǵan málimet sol mándegi sheshimdi bildirmeıdi. Ol másele basqa deńgeıde sheshiletindikten, sottyń buǵan esh qatysy joq. Biz tek naqty jeke máselelermen aınalysamyz. BAQ-ta jazylǵandaı deńgeıdegi isti qaramaımyz», - deıdi EAEO sotynyń sýdıasy.

Aıta keterligi, búgin Astanada «Qazaqstan men Eýrazııalyq ekonomıkalyq odaq zańnamasyna sáıkes, antımonopolııalyq qadaǵalaý» taqyrybynda semınar ótip jatyr. Sharaǵa otandyq ekonomıka sarapshylarymen birge, Mınskten kelgen EAEO sotynyń sýdıasy Venera Seıtımova men EAEO antımonopolııalyq qadaǵalaý Departamenti dırektorynyń orynbasary Ádil Qalıev qatysýda.

Eske sala ketsek, budan buryn Qyrǵyz Respýblıkasynyń 24.kg (1 qarasha kúni) aqparattyq agenttigi qyrǵyz kásipkerleri ekonomıkalyq múddesin qorǵaý maqsatynda Eýrazııalyq ekonomıkalyq odaq sotyna júgingeli otyrǵany týraly aqparat taratqan bolatyn. Al Qazaqstan tarapy (QR Qarjy mınıstrligi Memlekettik kirister komıteti tóraǵasynyń orynbasary Ǵosman Ámrın) eldiń arasyndaǵy kedendik suraqtarǵa baılanysty máseleni retke keltirý boıynsha qyrǵyz tarapy resmı túrde jaýap bermegenin málim etken edi. Qazaqstan Úkimeti qyrǵyz tarapynyń bes prıntsıpti baǵyt boıynsha syndarly ustanymyna úmit artyp otyr.