Qyrǵyz elindegi sý resýrstarynyń azdyǵy qobaljý týǵyzyp otyr - Energetıka mınıstrligi

ASTANA. QazAqparat - Qazaqstannyń Qyrǵyzstanmen energojúıesindegi elektr energııasynyń tapshylyǵy alańdaýshylyq týǵyzady. Búgin Ortalyq kommýnıkatsııalar qyzmetindegi brıfıng barysynda QR Energetıka vıtse-mınıstri Baqytjan Jaqsalıev osylaı málim etti. Eske salaıyq, brıfıng 2014-2015 jyldardaǵy kúzgi-qysqy jylytý maýsymyna daıyndyq barysyna arnalǵan bolatyn.

«Bizdiń paralell rejimdegi jumysymyz birshama qobaljý týǵyzyp otyr. Bul negizinen kórshiles Qyrǵyz elindegi sý resýrstary jınaqtalýynyń tym azdyǵyna baılanysty. Atap aıtqanda, Naryn-Syrdarııa JES kaskadynda, sonyń ishinde Toqtaǵul JES-inde sý az jınalǵan. Soǵan baılanysty qyrǵyzstandyq energojúıe boıynsha energııa tapshylyǵy 2 mlrd kVt/saǵatqa deıin bolady dep topshalaımyz, bunyń ózi qyrǵyz energojúıesine qaraı energııanyń aıtarlyqtaı aǵyny bolatynyn baıqatady», - dedi vıtse-mınıstr. Onyń aıtýyna qaraǵanda, qazirgi tańda Qazaqstan men Qyrǵyzstannyń salalyq mınıstrleri arasynda osy problemaǵa qatysty kelissózder júrgizilip jatyr. «Jalpy taǵy aıtaıyn, bul másele negizinen tabıǵı faktorlarǵa baılanysty, ıaǵnı Qyrǵyzstan taý massıvterinen jınaqtalatyn sýdyń tym azdyǵyna baılanysty bolyp otyr. Aǵymdaǵy jyly sýdyń jınalýy adam alańdatatyndaı az bolyp otyr», - dedi B. Jaqsalıev.