Qyrǵyz baıqaýshylary prezıdent saılaýyna joǵary baǵa berdi

ALMATY. QazAqparat- Qyrǵyz elinen kelgen baıqaýshylardyń pikirinshe, 20 qarasha - saılaý kúni Almatyda eshqandaı zańbuzýshylyq tirkelmegen. Bul týraly Qyrǵyz Respýblıkasy OSK janyndaǵy Leılek-Sýlýktý aımaqtyq saılaý komıssııasynyń arnaıy ókili Abdıvalı Hamraev, onyń áriptesi Qyrǵyz Respýblıkasy Bishkek ASK tóraǵasy Bahadyr Konýrov jáne baıqaýshy Tilek Shyǵaı aıtty, dep habarlaıdy QazAqparat tilshisi.

«Almatyda saılaý joǵary deńgeıde uıymdastyryldy dep esepteımiz. Biz barǵan ýchaskelerde eshqandaı zańbuzýshylyq bolǵan joq. Biz ondaǵan ýchaskelik saılaý komıssııasyn araladyq. Búkil jaǵdaıdy ýchaskelik saılaý komıssııalary qadaǵalady. Komıssııa músheleriniń tájirıbesi mol, ýchaskelik saılaý komıssııalarynda senim bildirilgen adamdar, kandıdattar men baıqaýshylar da boldy», – dedi Ábdivalı Hamraev.

Baıqaýshy Tilek Shyǵaı da áriptesteriniń aıtqanyna qosylyp, prezıdent saılaýynyń nátıjeli ótkenin aıtty.

«Halyqaralyq baıqaýshylar jáne basqa da áriptes retinde qatysyp otyrǵan elderdiń arasynda joǵary deńgeı baıqalady. Bul - Qazaqstanda saılaýdyń qalaı ótetininiń kórsetkishi boldy dep oılaımyn», - dedi ol.