Qyrǵyz azamattary Qazaqstanda 90 kún bola alady

ASTANA. QazAqparat – Qazaqstan Respýblıkasyndaǵy Qyrǵyz Respýblıkasy azamattarynyń kirý jáne bolý tártibine ózgertý engiziledi, dep habarlaıdy QazAqparat tilshisi.

«Qazaqstan Respýblıkasy Úkimetiniń 2012 jylǵy 21 qańtardaǵy № 148 qaýlysymen bekitilgen Kóship kelýshilerdiń Qazaqstan Respýblıkasyna kelýi jáne bolýy, sondaı-aq olardyń Qazaqstan Respýblıkasynan ketýi qaǵıdalarynyń 6-tarmaǵynyń 16-abzatsyn qoldanbaı, Qazaqstan Respýblıkasynyń Memlekettik shekarasyn kesip ótken kúnnen bastap Qyrǵyz Respýblıkasynyń azamattary úshin Qazaqstan Respýblıkasynda bolýǵa ruqsat etilgen kúntizbelik toqsan kún merzim belgilensin», - delingen Ashyq NQA portalynda jarııalanǵan Úkimet basshysy qaýlysynyń jobasynda.

Qaýly alǵashqy resmı jarııalanǵan kúninen keıin kúntizbelik on kún ótken soń qoldanysqa engiziledi jáne 2024 jylǵy 1 qyrkúıekke deıin qoldanylady.

Aıta keteıik, buǵan deıin Qyrǵyz azamattary elimizde 30 kún ǵana bola alatyn edi.