Qyrǵyz ardagerleri Jeńis kúnine oraı 1 188 dollardan alady

BІShKEK. QazAqparat – Qyrǵyzstanda Uly Otan soǵysynyń 107 ardageri Jeńistiń 77 jyldyǵyna oraı Prezıdent qorynan 10,8 mln som ($128,5 myń) kóleminde birjolǵy materıaldyq kómek alady, dep habarlaıdy QazAqparattyń menshikti tilshisi el prezıdentiniń baspasóz qyzmetine silteme jasap.

Memleket basshysy qol qoıǵan ókimge sáıkes, birjolǵy kómek kórsetý aıasynda UOS ardagerleriniń kelesi sanattary 100 myń somnan ($1188 astam) alady:

- Uly Otan soǵysynyń múgedekteri;

- Uly Otan soǵysyna qatysýshylar;

- Ekinshi dúnıejúzilik soǵys kezinde fashıster men olardyń odaqtastary qurǵan kontslager, getto jáne basqa da eriksiz ustaý oryndarynyń jasy kámeletke tolmaǵan burynǵy tutqyndary;

- 1941 jylǵy 8 qyrkúıekten 1944 jylǵy 27 qańtarǵa deıin qorshaýdaǵy Lenıngrad qalasynyń kásiporyndarynda, mekemeleri men uıymdarynda jumys istegen jáne «Lenıngradty qorǵaǵany úshin» medalimen jáne «Qorshaýdaǵy Lenıngrad turǵyny» belgisimen nagradtalǵan adamdar.

Budan basqa, atalǵan sanattaǵy adamdar 9 mamyrǵa qaraı 20 myń som (shamamen $237,7) mólsherinde jyl saıynǵy qosymsha birjolǵy aqshalaı járdemaqy, sondaı-aq alty eseptik kórsetkish jáne tórt eseptik kórsetkish mólsherinde birjolǵy aqshalaı járdemaqy alady.

Qazaqstanda Jeńis kúnine oraı ár ardagerge 1 mln teńge, ıaǵnı 2 329 dollardan berildi.

Elimizdiń eki óńirinde soǵys ardagerlerine 2 mln teńgeden (4659 dollar) birjolǵy kómek kórsetilgen.