Qymbat Dosjan «100 jańa esim» týraly: Qarapaıymdylardy izdep, qarabaıyrlyqqa urynyp qalmaıyq

ASTANA. QazAqparat - «Qazaqstannyń 100 jańa esimi» jobasyna kimderdi engizý kerek?» degen saýal áli de kópshiliktiń qyzý talqysyna túsip jatyr. Ortalyq kommýnıkatsııalar qyzmetinde kúni keshe ótken pikirtalastyq otyrysta «Qoǵamdyq kelisim» RMM baspasóz qyzmetiniń basshysy Qymbat Dosjan tyń jobaǵa jan-jaqty mańyz berýdi usyndy, dep habarlaıdy «QazAqparat» HAA tilshisi.

«100 jańa esim» jobasyna enýge kimder laıyq? Oblystardan qanshama ótinishter túsip jatyr. Usynystar arasynda depýttardyń da esimderi júr. Olarǵa «qoı» dep te nemese «naqty krıterııden shyqpaý kerek» dep taǵy aıta almaımyz. 500 ota jasaǵan medıtsına salasynyń bir doktoryn alyp qarasańyz, oblys kóleminde belgili ondaı kisi 100 adamnyń biri bolýǵa laıyqty. Ol muǵalim de bolýy múmkin. Baǵdarlamanyń kontseptsııasyn ózimiz tolyq bilmeımiz. 100 adamdy 1 jyl úshin be, álde 10 jyl úshin tańdap alýymyz kerek pe? Úsh balany órtengen úıden alyp shyǵý - erlik. Biraq, erteń televızııalyq sıýjet jasaı bastaǵanda-aq ol bir ǵana ocherktiń adamy bolyp shyǵýy múmkin. Odan keıin ol adam týraly aıtylmaıdy da, jazylmaıdy. Ony da eskerýimiz tıis. Qarapaıymdylardyń arasynan izdep júrip, qarabaıyrlyqqa urynyp qalýdan saqtanýymyz kerek sekildi», - deıdi Qymbat Dosjan.

Pikirtalasqa qatysqan Qymbat Dosjan el aýmaǵynan tys Qazaqstanǵa eńbek sińirip júrgen azamattardy umytpaýdy eske saldy.

«Eń bastysy, Qazaqstan Respýblıkasynyń azamaty bolý kerek deımiz. Al shetelde tursa da Qazaqstanǵa eńbegi sińip jatqan qazaqtar bar shyǵar. Muny da eskerý kerek», - deıdi spıker.

Qymbat Dosjan eshqandaı aımaqshyldyq, tamyr-tanystyq, burynǵy qatyp qalǵan qasań stereotıppen adamdardy tańdamaýǵa shaqyryp, «100 jańa esim» jobasynyń irikteýshi komıssııasyna qoǵamdyq uıymdardan kóbirek adam tartý kerektigin usyndy.