Qymbat, biraq mańyzdy joba - Almaty ákimi LRT salý týraly

ALMATY. QazAqparat – Jeńil relsti tramvaı (LRT) jelisi jobasyn júzege asyrý sheshimi 2023 jyly qabyldanady. Bul týraly Almaty ákimi Erbolat Dosaev málim etti, dep habarlaıdy QazAqparat tilshisi.

Kezdesý barysynda Medeý aýdanynyń turǵyny megapolıs basshysynan LRT qurylys jobasy qashan júzege asady dep surady.

«Tóle bı kóshesi boıyndaǵy LRT máselesin damý josparyna engizdik. Jumysty bastap jatyrmyz. Qalada júzege asa bastaǵan birneshe joba bar. Mysaly, Eýropa qaıta qurý jáne damý banki qatysatyn joba. Jeke usynystar da boldy. Endi biz ony qalaı júzege asyrýǵa bolatynyn eskere otyryp, ońtaıly shemany tabamyz. Aldymen shyǵyndar qaralady. Birinshiden, qaladan óz múmkindikterimizdi eseptep alýymyz kerek, bul jobany qaı ýaqytta júzege asyra alamyz? Bul negizgi jobalardyń biri bolmaq. 2023 jyly ne isteı aldyq jáne bul jobanyń qandaı formada júzege asatynyn, jumys qaı jyldardy qamtıtynyn kórsetemiz. 2025 jyldyń sońyna qaraı alǵashqy nátıjeni kóremiz. Bul jumys 2023 jyly bastalýy kerek», - dedi ákim.

Onyń aıtýynsha, qazir LRT jobasyn qarjylandyrýdyń ońtaıly shemasyn tabý qajet.

«LRT - qala úshin arzan emes, biraq óte mańyzdy joba. Mundaı kólik quraly qalaǵa kerek. Men usynylǵan jobalardy qarastyryp jatyrmyn. Jobaǵa qansha qarajat qajet bolatynyn jáne onyń qandaı kezeńde júzege asatynyn sheshý kerek. LRT baǵyty boıynsha jerdi satyp alýdy jalǵastyramyz. Kelesi jyldyń kókteminde jobanyń qalaı júzege asatynyn aıtamyn», - dedi Erbolat Dosaev.

Buǵan deıin Almatyda jeńil relsti kóliktiń birinshi jelisi 2027 jyly iske qosylatynyn jazǵan edik.

Aıta keteıik, LRT jelisiniń qurylysy 2020 jylǵa josparlanǵan bolatyn. Jobanyń ınvestıtsııalyq quny – 94 203 mln teńge.