Qylmystyq kodekste kásipkerlerdi qýdalaýǵa negiz bolatyn 118 bap bar – ombýdsmen

ASTANA. QazAqparat – Bir jyldyń ishinde qylmystyq iske tartylyp, sottalǵan kásipkerlerdiń sany 30 paıyz ósken. Kásipkerler quqyǵyn qorǵaý jónindegi ýákil Rýstam Júrsinov prokýratýra organdarynyń kásipkerlermen kezdesýinde osyndaı derek keltirdi, dep habarlaıdy QazAqparat tilshisi.

«Ádette bıznesti qylmystyq protseske tartý protsesin baǵalaý Qylmystyq kodekstiń 34 quramy boıynsha júrgiziledi. Sonymen qatar, Qylmystyq kodekste kásipkerlerdiń qyzmetin qamtıtyn 84 bap bar. Sonda kodekste bıznespen baılanysty 118 bap bar degen sóz.

Mysalǵa kommertsııalyq uıymdardaǵy «ókilettigin teris paıdalaný» (250-bap), «josyqsyz qurylys» (278-bap), «bóten múlikti ıemdený» (189-bap) baptaryn keltirýge bolady.

Osy atalǵan 118 bap boıynsha qylmystyq ister men sottalǵan adamdardyń sany jyl saıyn ósip otyr.

Máselen, 2020 jyly 51,3 myń qylmys jáne 3,9 myń sottalǵan adam tirkelse, 2021 jyly 58,5 myń qylmys jáne 5,1 myń sottalǵan adam tirkeldi. Ósim tıisinshe 14% jáne 30% boldy», - dedi Rýstam Júrsinov.

Onyń paıymynsha, atalǵan málimetter qylmystyq qýdalaý organdarynyń bızneske qysymy artqanyn kórsetedi.