Qylmystyq atqarý júıesindegi azamattyq qyzmetkerlerdiń tabysyn ústemeaqy arqyly kóterý usynyldy
Senat depýtattarynyń aldynda Qylmystyq-atqarý júıesi komıtetiniń tóraǵasy Janat Eshmaǵambetov túzetý mekemelerinde destrýktıvti dinı aǵymdar ıdeologııasynyń taralýyna jol bermeýge baǵyttalǵan sharalar týraly málimet berdi.
«Eńbekaqy kóterilgenine qaramastan, mysaly, bizdiń mekemedegi baqylaýshy serjanttardyń aılyǵy 120 myń teńdegeı bolady. Al ınspektor-ofıtserlerdiń aılyǵy – 150 myń teńge. Osyǵan baılanysty qazir Úkimet eńbekke aqy tóleýdiń biryńǵaı júıesi týraly jańa tásil ázirlep jatyr. Tásil boıynsha, áskerı jáne kúsh qurylymdarynyń qyzmetkerleri teńgerimsizdikke jol bermeıtin biryńǵaı laýazymdar tiziliminde turady dep kózdelip otyr. Osy reforma aıasynda baqylaýshylardyń laýazymdyq aılyqtaryn ishki ister organdarynyń aýdandyq bólimsheleriniń ınspektorlar quramy deńgeıine deıin kóterý kózdelgen», - dedi komıtet tóraǵasy.
Sondaı-aq, ol túzetý mekemelerinde jumys isteıtin azamattyq qyzmetkerlerdiń turaqtamaıtynyn aıtty. Munyń da basty sebebi – aılyqtyń azdyǵy.
«Sonymen birge mekemedegi azamattyq qyzmetshilerdiń kadrlyq biliktiligi máselesi sheshilmeı otyr. Bul – qarjy salasy men tyldaǵy esepshi, psıholog, zańger sııaqty mamandyq ıeleri. Olar ofıtserlik qurammen qatar sottalǵandarmen turaqty baılanysady, qabyldaý ótkizedi, quqyqtyq kómek kórsetedi. Olardyń eńbekaqysy 70 myń teńge men 110 myń teńge arasynda. Búgingi tańda osyndaı jumys kólemi kóp, aılyǵy tómen jaýapty ýchaskelerge tájirıbeli mamandardy tartý qıyn. Ádette mundaı mamandar bizdiń mekemelerde 3 jylǵa deıin tájirıbe jınaıdy da, basqa memlekettik organdarǵa nemese azamattyq sektorǵa aýysyp ketedi», - dedi komıtet basshysy.
Komıtet bul máseleni sheshýdiń jolyn da usynǵan. Alaıda qoldaý tappaǵan kórinedi.
«Bul azamattyq qyzmetkerlerdiń jumysyndaǵy kásibı erekshelikti eskere otyryp, aılyqtarnya tólenetin ústemeaqyny qylmystyq atqarý júıesinde qyzmet atqaratyn medıtsına mamandaryna tólenetin ústemeaqy sııaqty kóterý kerek. Qyzmetkerlerdi yntalandyrýdyń biz usynyp otyrǵan bul túri ázirge qoldaý tappaı tur», - dedi ol.