Qylmysty ashý úshin qylmysker sekildi oılaı bilý kerek – krımınalıst

ÓSKEMEN. QazAqparat – Qylmyskerlerdi ustaýda krımınalısterdiń eńbegi zor. Sebebi, qylmys bolǵan jerge tabany birinshi tıip, aıǵaqtardy jınaıtyndar – osy mamandyq ıeleri. 7 mamyr – Otan qorǵaýshy kúninde Óskemen qalalyq PB krımınalıstıka bólimi bastyǵynyń orynbasary Aqylbek Muhametqalıevpen suhbat qurǵan edik.

Aqylbek Muhametqalıev Kúrshim aýdany Saryóleń aýylynda dúnıege kelgen. Óskemendegi Qazaqstan-Amerıkandyq erkin ýnıversıtetin 2005 jyly «Zańger» mamandyǵy boıynsha támámdady. Dıplom alǵan soń áskerge attanǵan.

- Otan aldyndaǵy boryshymdy ótep kelgennen keıin Glýbokoe aýdandyq polıtsııa bólimine krımınalıst bolyp jumysqa turdym. Krımınalıstiń jumysy qaýyrt, jaýapkershiligi aýyr. Kún-túnge, senbi, jeksenbige qaramaımyz. Qylmys bolǵan jerge birinshi bolyp baramyz. Jan-jaqty muqııat tekserip, aıǵaq zattardy jınaımyz, - deıdi ol.

2009 jyly Óskemenge jumysqa aýysqan. Polıtsııa basqarmasynyń krımınalıstıka bóliminde eńbek etip, ózin jaqsy qyrynan kórsete bildi. Sonyń arqasynda 7 jyldan keıin bólim bastyǵynyń orynbasary laýazymyna kóterildi.

- Jumys barysynda ártúrli qylmystardyń ashylýyna septigimiz tıdi. Máselen, birde Ablaketka kentinde kisi ólimi bolǵan páterge bardym. Qaskóı zeınetkerdi pyshaqtap óltirip ketipti. Bólme ishin muqııat tekserdik. Esikten qylmyskerdiń saýsaq izin alyp, papılon júıesi arqyly izdestirdik. Júıe buǵan uqsaıtyn birneshe adamnyń saýsaq izin kórsetti. Sodan keıin saraptama jasap, naqty kimniń izi ekenin anyqtadym. Osylaısha, qylmyskerdiń kim ekeni belgili boldy. Mundaı oqıǵalar kóp. Urlyq jasaǵandar da jıi qolǵa túsip jatady, - deıdi Aqylbek Muhametqalıev.

Dese de, qazir zańdy elemeıtinder saýsaq izi arqyly tym sırek ustalatyn kórinedi. Jaýapqa tartylmas úshin qolǵap kıip, ár qımyldaryn aldyn ala oılastyryp jasaıdy. Biraq, krımınalıstıka salasy da bir orynda turǵan joq. Qylmys jasaǵandardyń kim ekenin anyqtaýdyń amal-tásilderi kóbeıip keledi.

- Qazir bólimde 26 krımınalıst bar. Maman tapshy emes. Ujymymyzdyń bereke-birligi jarasqan. Qatarymyzdaǵy ár azamat óz salasyna berilgen. Menińshe, ekiniń biri krımınalıst bola almaıdy. Qylmysty ashý úshin qylmysker sekildi oılaı bilý kerek. Onyń qalaı kelip, qalaı ketkenin anyqtaý, dáleldemelerdi jınaý shydamdylyq pen eptilikti qajet etedi, - deıdi tisqaqqan krımınalıst.

Keıipkerimiz ómirlik jarymen 3 bala tárbıelep otyr. Úlkeni 11-de, kenjesi 3 jasta.

Sóz sońynda ol Qazaqstannyń er azamattaryn merekelerimen quttyqtady.

- Eń bastysy, densaýlyqtaryńyz myqty bolsyn! Adamgershilikke tán asyl qasıetterdi saqtap, el úshin eńbek eteıik. Bala-shaǵamyz aman bolyp, Otanymyz órkendeı bersin! - dedi Aqylbek Muhametqalıev.