Qylmyskerler urlaǵan aqshaǵa 50 mektep salýǵa bolatyn edi - MKK
Profılaktıkalyq jumys jáne baqylaý basqarmasy basshysy orynbasarynyń mindetin atqarýshy Erden Jumanyń aıtýynsha, anyqtalǵan qylmystardyń ishinde aqshany jymqyrý, salyqtan jaltarý, jalǵan shot-faktýra jasaý jáne taǵy basqa zań buzýshylyqtar bar.
"Osy ýaqytqa deıin aıaqtalǵan qylmystyq ister boıynsha zalaldyń jalpy sommasy 106 mlrd teńgeni qurady. Bylaısha aıtqanda, ol aqshaǵa shamamen 50 mektepti salýǵa bolatyn edi. Tergeý kezinde 50,6 mlrd teńge óndirildi. Budan bólek, qylmyskerlerdiń 27,7 mlrd teńgege baǵalanǵan múlki tárkilendi. Ótken jyly zalaldy óndirý kórsetkishi artty. Búginde atalǵan kórsetkish 74 protsentti qurap otyr", - dedi E.Juma búgin Astanada ótken baspasóz máslıxatynda.
Onyń sózine qaraǵanda, uıymdasqan qylmystyq toptarǵa qatysty 58 is tergelip, 48-i aıaqtaldy. Sot sanktsııasymen 2 mlrd teńgeniń múlki tárkilendi. Budan bólek, aýyr jáne asa aýyr 1 827 qylmystyq istiń 70 protsenti aıaqtaldy.
Búginde jalǵan shot-faktýralardy rásimdeýge qatysty qylmystyq ister artyp otyr. Salyqtan jaltarý áreketteri de azaımaı keledi. Memlekettik jáne kvazımemlekettik satyp alýlar kezinde aqsha jymqyrý faktileri de az bolǵan joq. Osy salada 1 424 qylmystyq istiń 81 protsenti aıaqtaldy.
Aıta keteıik, baspasóz máslıxatynda Erden jalǵan aqshany qaı kýpıýramen jıi jasaıtynyn da aıtyp berdi. Sondaı-aq, qylmyskerlerdiń jalǵany aqshany qalaısha jasaıtynyn túsindirdi.