Qylmysker qarshadaı balaǵa pyshaq taqaǵanda qatelesýge esh bolmaıtyn edi – polıtseı
- Polıtseı bolýyńyzdyń sebebi nede?
1989 jyly Kúrshim aýdany Quıǵan aýylynda dúnıege keldim. Mektep bitirgen soń Óskemendegi joǵary oqý oryndarynyń birine «Zańger» mamandyǵyna qabyldandym. 2011 jyly qolyma dıplom aldym. Áskerı kafedrada oqyp, 40 kún polıgonda boldym.
2012 jyldyń tamyz aıynda qalalyq Polıtsııa basqarmasyna jumysqa ornalastym. Dál osy jyly úılenip, shańyraq kóterdim. Negizinen bala kúnnen polıtsııa qyzmetkeri bolýdy qaladym. Qylmyskerlerdi quryqtap, ózgege paıdamdy tıgizgim keletin. Áýletimizdegi alǵashqy polıtseı ózimmin. Ákem Aýǵan soǵysyna qatysqan adam.
- Áýelde qıyn bolǵan shyǵar?
- Ár salanyń óz qyzyǵy men qıynshylyǵy bolady. Basynda sál úırenise almaı júrdim, ásirese ýaqyttyń tapshylyǵyna. Tańerteń 7-de jumysqa kelip túngi 1-2-lerde qaıtamyz. Osylaı damylsyz jumys istedik. Biraq qazirgi polıtseılerde olaı emes. Úılerine ýaqtyly qaıtady. Keıbireýler burynǵyny ańsap jatady ǵoı. Kezinde bári jaqsy edi dep. Menińshe, qazir saqshylarǵa barlyq tıisti jaǵdaı jasalǵan. Jalaqy joǵarylap, baspanasy joqtarǵa aı saıyn páteraqy da beriledi.
- Kúni-túni jumysta bolǵanyńyz úshin áıelińiz renjimedi me?
- Joq. Ekeýimiz qyz-jigit bolyp kezdesip júrgenimizde ol meniń osy salany tańdaǵanymdy biletin. Keıbir saqshylar úılengen soń jarty jyl ótpeı jatyp ajyrasyp ketetinin kórip júrmiz. Kelinshegime únemi túsinistikpen qaraǵanyna rızamyn. 3 balamyz bar: bir ul, eki qyz. Áıelim buryn bankte jumys istegen, qazir jeke kásipkerlikpen aınalysady.
- Ulyńyz óskende kim bolamyn deıdi?
- Ákem sııaqty polıtsııa qyzmetkeri bolamyn deıdi. Eger óskende rasymen osy salaǵa bet bursa qarsylyǵym joq. Óz tańdaýy ózinde ǵoı. Jumys barysynda bilim ordalaryna baryp, jastardy polıtsııa qataryna tartyp, úgit-nasıhat júrgizemiz. El-jurtynyń qaýipsizdigin qamtamasyz etip, zańbuzýshylyqqa tosqaýyl bolǵysy keletinder kóbeıe túsedi degen senimdemin.
- Jumys barysynda qandaı erekshe oqıǵalar boldy?
- Qaýyrt qyzmettiń ár kúninde bir oqıǵa bolyp jatady. Sonyń ishinen birnesheýin aıtyp bereıin. Birde qys kezinde qalada kólik tonaý jıilep ketken-tuǵyn. Kúnine 4-5 kólik tonalatyn. Osylaı 3 aı jalǵasty. Qylmyskerlerdi ustaý úshin kúni-túni kóshelerdi torýyldaýmen júrdik. Ol kezde qazirgideı kameralar joq.
Túngi ýaqyt. Saǵat tili shamamen 2-den asty. Aıazǵa qaramastan qýysta qımyl-qozǵalyssyz tosyp otyrmyz. Kenet 3 jigit kóz aldymyzda kólik tonaı bastady. Tutqıyldan atyp shyǵyp, olardy qolǵa túsirdik. Sońynan belgili bolǵandaı, úsheýi de stýdent eken. Aqshanyń joqtyǵynan qylmysqa barypty. Tergeý amaldary aıaqtalǵan soń is sotqa jiberildi.
2013-2019 jyldary kámeletke tolmaǵandar isi jónindegi ınspektor boldym. Sol kezde jastar arasynda bopsalaýshylyqpen, esirtki satatyndarmen kúrestik. Otbasylyq kıkiljińderge de baratynbyz. Bir kúni Kırov kóshesindegi jataqhanada kúıeýi áıelin dalaǵa qýyp shyǵypty. Habar túsken soń kóp uzamaı oqıǵa ornyna kelip jettik. Álgi erkek bizdi kórgende ógeı balasynyń tamaǵyna pyshaq taqap, tutqynǵa aldy. Qarshadaı búldirshin 2-aq jasta. Mundaı sátte qatelesýge jol joq. Jedel járdem men TJD qyzmetkerlerin shaqyrtyp qoıdyq. Qaskóı esik tabaldyryǵynda tur. Ony sózge aınaldyryp, teris qadam jasamaýǵa shaqyrdyq. Kenet bala onyń qolynan bosap, bir-eki qadam artqa júrdi. Osy urymtal sátti qalt jibermeı, áriptesim ekeýimiz tap berdik. Kúrtkemen qolyndaǵy pyshaǵyn jaba qoıyp, ózin jerge qulattyq. Keıin estýimizshe, ol sot sheshimimen túrmege qamalypty.
- Qyzmetin endi bastap jatqan polıtseılerge qandaı aqyl-keńes aıtasyz?
- Ár jas mamanmen jeke-jeke jumys júrgizemiz. Kelgen alǵashqy kúninen bastap shydamdylyqqa baýlımyz. Polıtsııa qyzmetkeri zańdy búge-shúgesine deıin bilýi qajet. Sol úshin oqýdan jalyqpaı, óz tańdaǵan salańa beıimdelgen jón.
Qazir Ertis PB jergilikti polıtsııa qyzmeti bastyǵynyń orynbasary bolyp qyzmet etýdemin. Qaramaǵymda kámeletke tolmaǵandar isi jónindegi 24 ınspektor, 43 ýchaskelik polıtseı men onyń 9 kómekshisi bar. Olardyń árqaısysyna qolymnan kelgenshe kómektesip, kórgen-bilgenimdi aıtyp otyramyn. Adal eńbek etemin degen adamǵa esigimiz árdaıym ashyq. Kelip jatqan jastar arasynda jumystyń aýyrlyǵyna shydamaı ketip qalatyndar az emes. Negizi qıyndyqqa 3 jyl tózgen adam, ary qaraı qyzmet ete beredi.
- Áńgimeńizge kóp rahmet!