Qylmys jasaǵan árbir ekinshi jasóspirim oqymaıdy jáne jumys istemeıdi – ІІM

ASTANA. QazAqparat – Qylmyskerlerdiń 80% - jumyssyz, 33% - buryn sottalǵan. Taldaý negizinde alynǵan mundaı derekterdi Іshki ister mınıstrliginde ótken brıfıngide vedomstvo ókili Shuǵyla Turlybek aıtty, dep habarlaıdy QazAqparat tilshisi.

Brıfıng barysynda Shuǵyla Turlybek tergeý departamentiniń bastyǵy Sanjar Ádilovtiń elordalyq №22 mektep-lıtseıdiń joǵary synyp oqýshylary jáne muǵalimderimen kezdesip, qoǵamdyq qaýipsizdikti qamtamasyz etý tujyrymdamasyn talqylaǵanyn atap ótti.

«Tujyrymdamanyń máni - ishki ister organdarynyń ómirdiń barlyq salalaryn qamtı otyryp, qaýipsiz jáne quqyqtyq qoǵam qurý úshin azamattarmen ózara is-qımyldyń servıstik modeline kezeń-kezeńimen kóshý. Qazirgi taldaý kórsetkendeı, qylmyskerlerdiń 80% - jumyssyz, 33% - buryn sottalǵan. Jeke tulǵaǵa qarsy qylmystardyń 50% alkogol jáne esirtkige mas kúıinde jasalǵan. Árbir ekinshi kámeletke tolmaǵan quqyq buzýshy oqymaǵan jáne jumys istemeıdi. Megapolısterdegi qylmystardyń 51%-yn syrttan kelýshiler jasaǵan», - dedi mınıstrliktiń ókili Shuǵyla Turlybek.

Kezdesý barysynda Sanjar Ádilov qylmys jasaý máselesin kúsh qoldaný sharalarymen sheshý múmkin emes ekenin aıtty.

Onyń sózinshe, mundaı áreketke barýǵa áleýmettik, ekonomıkalyq, geografııalyq, kóshi-qon, tabıǵı, mádenı, demografııalyq jáne basqa faktorlar áser etedi.