Qylmys qurbandaryna arnalǵan qordan aqsha qalaı tólenedi
«Ol qordyń aqshasy qaıdan túsedi? Árbir qylmysker jasaǵan zańbuzýshylyǵyna qaraı mindetti jarnany aýdaratyn bolady. Onyń mólsheri 5-30 aılyq eseptik kórsetkish, ıaǵnı 12 000-72 000 shamasynda bolady. Qorǵa 1 mıllıard teńge jınalady degen jospar bar. Bıyl tıisti zań qabyldandy. Osy aıda atalǵan qujat kúshine endi», - dedi M.Axmetjanov Astanada ótken baspasóz máslıxatynda.
Onyń aıtýynsha, atalǵan qordyń aqshasy qylmystan zardap shekken azamattarǵa shuǵyl túrde tólenetin bolady.
«Zorlyq jasaý, aýyr jaraqat salý, adam óltirý sııaqty qylmystar bar ǵoı. Dál osy sanattaǵy zańbuzýshylyqtardan zardap shekkenderge qarjylaı kómek beriledi. Máselen, qylmyskerdi áli ustaǵan joq deıik, ıa bolmasa, ol qashyp ketti. Ony tapqansha zardap shekkenderge kómek berý kerek qoı. Sol sebepti jańaǵy qor qurylyp otyr. Bul shyǵynnyń ótemaqysy emes, bir rettik qarjylaı kómek qana. Adam qaıtys bolsa, onyń týǵan-týystaryna 10 kúnniń ishinde bir rettik qarjylaı kómek beriledi. Eshqandaı qaǵazbasty jumys bolmaıdy. Aqsha birden aýdarylady», - dep atap kórsetti M.Axmetjanov.
Aıta keteıik, búgingi baspasóz máslıxatynda M.Axmetjanov 5 myń adamdy túrmeden bosatýǵa qatysty túsinik berdi. «Búginde áleýmettik jelilerde shyndyqqa janaspaıtyn aqparattar taralýda. Aýyr qylmys jasaǵan 5 myń adam shyǵady deıdi. Olar zorlyq jasaǵan, adam óltirgen, qaraqshylyq jasaǵan deıdi. Buqaralyq aqparat quraldaryna da jańalyqtar shyqty. Bunyń barlyǵy shyndyqqa janaspaıdy. Bireýler máseleniń anyq-qanyǵyna mán bermedi, endi bireýler sensatsııa jasaımyz dep, solaı berdi. Sonyń saldarynan qoǵam ol jańalyqty durys túsinbeı qaldy», - dep atap kórsetti M.Axmetjanov. Onyń aıtýynsha, 5 myń adamnyń ishinde qaraqshylar, pedofılder, zorlyq jasaǵandar, adam óltirgen basbuzarlar joq.