Qylmys qalaı jasaldy? - respýblıkalyq basylymdarǵa sholý

ASTANA. 15 maýsym. QazAqparat - Qazaq aqparat agenttigi respýblıkalyq basylymdarda 15 maýsym, juma kúni shyqqan ózekti materıaldarǵa sholýdy usynady.

***

HHІ ǵasyr basyndaǵy eýrazııalyq yn­tymaqtastyq ıdeıasy jyldan-jylǵa sony mazmunmen tolyǵyp kele jatyr desek, bul eń aldymen, el Prezıdenti Nursultan Nazar­baev­tyń eńbeginiń nátıjesi ekeni sózsiz. Elba­synyń 1994 jyly Máskeý memlekettik ýnı­versıteti qabyrǵasynda usynǵan eýra­zııalyq yqpaldasý jobasy búginde óziniń ómirsheń­digin, burynǵy keńestik keńistiktegi halyq­tardyń jarqyn bolashaǵy úshin mańyzdy­lyǵyn aıqyndaı túsýde. Jahandaný zamanynda biryńǵaı ekonomıkalyq keńis­tiktiń róli artyp, dostastyq elderi aýmaǵyn­daǵy halyq­tardyń rýhanı qarym-qaty­nastary da ja­ńasha sıpatqa ıe bolyp keledi. Soǵan oraı búgin Astanada TMD-ǵa múshe elderdiń memleketaralyq gýmanı­tarlyq yn­tymaqtastyq qorynyń «Dos­tas­tyqtyń má­denı astanalary» jobasy aıasynda QR Máde­nıet jáne aqparat mınıstrliginiń uıymdas­tyrýymen ótip jatqan «Jańa álem­degi eýrazııalyq mádenıet» halyqara­lyq forýmy óz jumysyn bastamaq. Óńirlerdiń órkendep, mádenı, rýhanı, aqpa­rattyq qarym-qatynastar da­my­ǵan saıyn kórshiles, irgeles halyqtardyń mádenıetimen ózara baılanystyń nyǵaıa túsetiretin jıyn jaıynda «Egemen Qazaqstan» basylymy búgingi sanynda shyqqan «Nursultan NAZARBAEV: Adamzat tarıhynyń kúretamyry - mádenıet» atty maqalasynda egjeı-tegjeıli toqtalady.

***

Pavlodarda 85 jastaǵy zeınetker onyń aıaǵyn avtobýs basyp ketkeni úshin qalalyq avtokombınattan sot arqyly 1 mıllıon teńge óndirip aldy, dep jazady «Lıter» basylymy «Qaýipti reıs» taqyrybymen jarııalaǵan maqalasynda. Basylymnyń atap kórsetýinshe, 27 jasar avtobýs júrgizýshisi aıaldamada adamdardyń tolyqtaı túsýin kútpesten júre jónelgen. Nátıjesinde ıAnına Sachkova avtobýstyń baspaldaǵyna súrinip, qulap túsken. Al qoǵamdyq kóliktiń artqy dóńgelegi keıýananyń aıaǵyn basyp ótken. Júrgizýshi jolaýshylardyń aıqaıynan keıin ǵana baryp toqtaǵan. Sodan beri qart kisiniń janary kórmeı, júrýge shamasy kelmeýde. Júrgizýshi  úsh táýlikke qamaldy. Sol kezde zeınetker júrgizýshiden jáne avtoparkten bir mıllıon teńge ótemaqy tóleýdi talap etti. Sýdıa ájeıdiń bul aryzyn tolyǵymen qanaǵattandyrý týraly sheshim qabyldady.

***

Jańaózen turǵyndary munaı kompanııasyna ornalastyramyz degen alaıaqtarǵa óz qoldarymen 26 mıllıon teńgeden astam aqsha berip, barmaq tistep qaldy, dep jazady «Ekspress K» gazeti «Nevtegazovyı lohotron» dep atalatyn maqalasynda. Basylymnyń jazýynsha, alaıaqtar qala turǵyndaryn «ÓzenMunaıGaz» kompanııasyna jumysqa ornalastyryp beremiz dep, olardan aqsha jınaǵan. Zardap shekkenderdiń ár qaısysy jalǵan jumys orny úshin 750 myńnan bir mıllıonǵa deıin aqsha bergen. Qarjy polıtsııasynyń aımaqaralyq basqarmasyna aldanyp qalǵan jańaózendikterden aryz-shaǵym ótken jyldyń sáýir aıynan bastap túse bastaǵan. Alaıaqtardy tek 2012 jyldyń aqpan aıynda qolǵa túsirý múmkin boldy.

***

Almaty ob­ly­synda­ǵy «Arqankergen» zastavasynda bol­ǵan oqıǵalardyń mán-jaıyna «Aıqyn» basylymy tereńirek úńilip kórgen.

«Qazaqstan-Qytaı shekarasynda órtelgen «Arqankergen» zastava beketinde tiri qalǵan jalǵyz shekarashy Vladıslav Chelahqa 14 qyzmettesterin jáne qoryqshyny óltirdi degen aıyp taǵyldy. Shekarashylardyń óltirilýine qatysty tergeý jumystary Elbasynyń baqylaýynda, - dep málimdedi Qazaqstan Bas áskerı prokýrory Erǵalı Merzadınov. Bas áskerı prokýror  on bes adamnyń ólimine qaty­sy bar degen kúdikpen qamaýǵa alyn­ǵan Vladıslav Chelahtyń tergeý barysynda bergen jaýaptary túsirilgen beıne-fragmentti jýrnalısterge kórsetti», - delingen maqalada.

Júrgizilgen tergeý amaldarynyń nátıjeleri, sarap­ta­malary men Chelahtyń kórsetkenderi týraly tolyǵymen «Qylmys qala jasaldy?» atty maqaladan oqı alasyzdar.