«Qylqalam ushyndaǵy qudiret»: Elordada kórkemsýret kórmesi ashyldy
«Qylqalam ushyndaǵy qudiret» atty kórmege atalǵan mýzeı qoryndaǵy qazaqstandyq kórnekti qylqalam sheberleriniń 70-ke jýyq zamanaýı óner týyndysy qoıylǵan.
«Qoǵamnyń tarıhı damýy men órkendeýi sol eldiń mádenıeti men ónerine baılanysty. Qazirgi ýaqytta elimizde kórkemóner týyndylaryna aıyryqsha kóńil bólinip jatyr. Beıneleý óneriniń keń qanat jaıyp kele jatqany osyǵan dálel bolsa kerek. Egemendik alǵaly beri qazaqstandyq qylqalam sheberleriniń týyndylaryna qyzyǵýshylyq artyp keledi. Sol sebepti 60-jyldar urpaǵy ókili, Qazaqstan beıneleý óneriniń klassıgi, aıryqsha qoltańba ıesi Shaımardan Sarıev atyndaǵy kórkemsýret qoldanbaly-sándik óner mýzeıimen birlesip osy kórmeni uıymdastyryp otyrmyz.
Jalpy beıneleý óneri adamzat qoǵamynyń alǵashqy kezeńinde paıda boldy. Ol adam balasyna zattyq dúnıeni taný úshin ári osy qoǵamdaǵy alar ornyn bilýge qajet bolǵandyqtan týyndady. Kórmeden qazaq aýylynyń ıisin sezip, ulttyq tarıh pen dástúrdi kóre alamyz», - dedi QR Ulttyq mýzeıi dırektorynyń orynbasary Abaı Satybaldın kórmeniń ashylýynda.
Sondaı-aq, kórmede kópshilikke beımálim avtorlardyń da keskindemelik týyndylary usynylǵan.
«Kórmedegi týyndylardyń deni otanǵa, týǵan jerge jáne ulttyq-dástúrdi dáripteýge arnalǵan. Jáne munda bizdiń óńirde ǵana emes elimizde keńinen tanymal qylqalam sheberleriniń týyndysy qoıylǵan. Ár týyndynyń ózindik tarıhy bar. Degenmen birneshe jumysty erekshe atap ótkim keledi. Ol Mahambet Ótemisulyna arnalǵan, aýyl tirshiliginen habar beretin jáne quraq kórpe beınelengen týyndynyń orny erekshe», - dedi Atyraý oblystyq Sh. Sarıev atyndaǵy kórkemsýret jáne qoldanbaly-sándik óner mýzeıiniń dırektory Tólegen Orynbasaruly.
Ulttyq mýzeıde ashylǵan «Qylqalam ushyndaǵy qudiret» atty kóshpeli kórmeni elorda jurtshylyǵy 30 tamyzǵa deıin tamashalaı alady.