KVI saldarynan óndiristik kórsetkishterge túzetýler engizýge májbúr boldyq – Nurlan Noǵaev
«Árıne, óz sózimde koronavırýstyń aldyn alý máselesin de aıtyp ótpeı bolmaıdy. Bizdiń sala pandemııadan zardap shekti, bul munaı baǵasyna da áser etip, OPEK+ kelisimi aıasynda munaı óndirisin shekteýge, ýran óndirisin tómendetýge jáne taǵy basqa saldarǵa ákep soqty. Qazirgi daǵdarys jáne ǵalamdyq syn-tegeýrinder jaǵdaıynda Memleket basshysy «Jańa jaǵdaıdaǵy Qazaqstan: is-qımyl kezeńi» atty Joldaýynda elimizdi daǵdarystan keıingi kezeńnen shyǵarýdyń negizgi mindetterin atap ótti. Osy oraıda Energetıka mınıstrligi Memleket basshysynyń Joldaýynda berilgen tapsyrmalaryn oryndaý boıynsha aýqymdy jumys atqarýda», - dedi mınıstr vedomstvonyń keńeıtilgen alǵa májilisinde.
Onyń aıtýynsha, koronavırýstyq ınfektsııanyń taralýyna baılanysty ótken jyldyń aqpan aıynan bastap Mınıstrlikte múddeli kompanııalardyń qatysýymen qurylǵan COVID-19 jaǵdaıyn baqylaý jónindegi jedel shtab jumys isteıdi. Jobalardaǵy jaǵdaı týraly jedel aqparat kún saıyn shtabqa tapsyrylady.
«Qazirgi ýaqytta barlyq kompanııalar koronavırýstyq ınfektsııa taralýynyń aldyn alý jáne epıdemıologııalyq ahýal nasharlaǵan jaǵdaıda daıyndyqty qamtamasyz etý boıynsha is-sharalar josparlaryn ázirlep bekitti. Bizdiń áriptesterimizdiń qajyrly eńbeginiń arqasynda Qazaqstannyń otyn-energetıka júıesi pandemııa soqqysyna tótep berdi. Vırýsqa qaramastan, mamandar elimizdi qajetti energııamen qamtamasyz ete otyryp, elektr stantsııalarynda, munaı óńdeý zaýyttarynda, ken oryndarynda, basqa da óndiris nysandarynda jumysyn toqtatqan emes. Sonymen qatar, Mınıstrlik salany qoldaý maqsatynda birqatar sharalar qabyldady. Barshańyzǵa belgili, koronavırýstyń taralýy búkil álemdik energııa resýrstar naryǵyna eleýli áser etti. Osyǵan baılanysty biz ótken jyldyń óndiristik kórsetkishterine túzetýler engizýge májbúr boldyq», - dedi N. Noǵaev.