Kvazısektor men memlekettik organdar atyraýlyq kásipkerlerge 1 mlrd teńgege jýyq bereshegin ótedi
Sybaılas jemqorlyqqa qarsy is-qımyl agenttigi Atyraý oblysy boıynsha departamentiń basshysy Erulan Serikqalıevtyń málimetine súıensek, jyl basynan beri «Bızneske jol» jobasy aıasynda 386 kásipkerdiń quqyǵy qorǵalǵan.
«Bul joba Atyraý oblysynyń óńirlik kásipkerler palatasymen birlese júzege asyrylady. Atalǵan joba kásipkerlerge qujattardy resimdeý kezinde ártúrli ákimshilik kedergilerdi sezinbeýge kómektesedi. Jobany iske asyrý bastalǵannan beri 386 kásipkerdiń quqyǵy qorǵaldy. Onyń ishinde memlekettik satyp alýǵa qatysty 152, memlekettik qyzmetter men baqylaý boıynsha 2 jáne tabıǵı monopolııaǵa baılanysty 49 ótinish qaraldy. Departamenttiń usynysymen memlekettik satyp alý, kedendik jáne salyqtyq ákimshilendirý salasyndaǵy kvazımemlekettik sektor men memlekettik organnyń sýbektilerinen 153 kásipkerge 992 mln teńge mólsherinde bereshek tólendi», - dep habarlady Erulan Serikqalıev.
Onyń aıtýynsha, kásipkerlerden túsken ótinishte memlekettik qoldaý, salyqtyq ákimshilendirý, júk tasymaldaý, jer qatynasy men kedendik ákimshilendirý máseleleri qamtylǵan.
«Sheneýnikter ártúrli kedergini ózderi qoldan jasaıdy. Kásipkerler mundaı kezde óziniń quqyǵyn qorǵaı bilýi kerek. Degenmen, bizdiń ortalyq kásipkerlerge kómektesýge árkez daıyn», - dep málim etti Erulan Serikqalıev.
Eske sala ketelik, buǵan deıin Atyraýda kirister basqarmasy kásipkerden 42 mln teńgeni zańsyz óndirip alǵanyn habarlaǵan bolatynbyz.