Kvazımemlekettik sektor ıgerilmegen qarjyny bıýdjetke qaıtarýǵa mindetteledi

ASTANA. QazAqparat - Kvazımemlekettik sektordyń sýbektileri ıgerilmegen qarjyny bıýdjetke qaıtarýǵa mindetteledi. Bul týraly Senattyń Qarjy jáne bıýdjet komıtetiniń keńeıtilgen otyrysynda málim boldy, dep habarlaıdy QazAqparat.

«Búginge deıin kvazısektordyń ınvestıtsııalyq jobalaryn júzege asyrýdan qarjy qaldyqtaryn bıýdjetke qaıtarý máselesi sheshilmegen. Biz osy taqyrypty tyńǵylyqty talqyladyq. Bul rette senatorlar biz jyl saıyn kvazımemlekettik sektordy qoldaýdy jalǵastyryp kele jatqanymyzdy aıtqan bolatyn. Al memlekettiń ekonomıkalyq máselelerin sheshýde salynǵan resýrstarǵa qaıtarym qanshalyqty sáıkes keletindigi shynymen de suraq týdyrady», - dedi N. Godýnova.

Onyń sózine qaraǵanda, 2017 jyly eseptelgen dıvıdendter men aýdarymdar kólemi taza tabystan 6 paıyzǵa deıin tómendedi.

«Degenmen de Esep komıtetiniń jobalardy iske asyrý deńgeıine qaraı kvazımemlekettik sektor sýbektilerine qarjyny kezeń -kezeńmen bólý týraly usynystary ázirge oryndalmady. Sonymen qatar bıýdjettik baǵdarlamalar ákimshilerine sekildi nátıjege negizdelgen bıýdjetteý ustanymy boıynsha qarjylandyrý tetikterin bekitý nusqaýlary da iske asyrylmady», - dedi N. Godýnova.

Óz kezeginde Qarjy vıtse-mınıstri Berik Sholpanqulov kvazımemlekettik sektor paıdalanbaǵan qarjyny bıýdjet enshisine qaıtarý tetikteri pysyqtalyp jatqanyn atap óttin.

«Atalǵan túzetý QR Ulttyq ekonomıka mınıstrligi janynan qurylǵan jumys tobynda qarastyrylyp jatyr», - dedi vıtse-mınıstr.