Kvazımemlekettik kompanııalardyń bıýdjeti qoǵam úshin ashyq bolýy kerek - Berik Dúısenbınov
«Jaqynda Prezıdent Qasym-Jomart Toqaevtyń qaıǵyly qańtar oqıǵalaryna qatysty «Habar» telearnasyna bergen suhbatynda parlamenttik júıeni baıypty túrde reformalaý qajettigin atap ótken bolatyn. Al 11 qańtarda Májilistiń jalpy otyrysynda Memleket basshysy keıbir memlekettik organdardyń qyzmetin sátsiz dep atap, olardyń qoǵamda áleýmettik teńsizdik pen múliktik jiktelýge ákep soqqanyn aıtty. Soǵan baılanysty ol áleýmettik-ekonomıkalyq saıasatty qaıta quryp, onyń ishinde bıýdjettiń qosymsha kiris kózderin tabý týraly tapsyrma berdi. «Aq jol» fraktsııasy búginde ondaı kózderdiń bar ekenin, tek olardyń qoǵam úshin kórinbeıtinin, al onyń resýrstary memleketke emes, az ǵana bir toptyń múddesine ǵana qyzmet etedi dep esepteıdi. Dál osy Parlament júıesin reformalaý arqyly osy qarjy kózderin «jaryqqa shyǵaryp» jáne olardy halyqqa qyzmet etkizýge múmkindik bar», - dedi B. Dúısenbınov Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha, «Aq jol» partııasy birneshe jyldar boıy jyl saıynǵy respýblıkalyq bıýdjetti bekitý jáne onyń júzege asyrylýy boıynsha esepti tyńdaý barysynda Úkimetke osy talapty qoıyp keledi.
«Másele ekonomıkamyzdyń 60 paıyzyn quraıtyn, 6,5 myń zańdy tulǵa kiretin kvazımemlekettik sektordyń qoǵam aldyndaǵy ashyqtyǵy men eseptiligi týraly bolyp otyr. Kvazıkásiporyndardyń jarǵylyq kapıtaly men shyǵyndary memlekettik bıýdjettiń mıllıardtaǵan somasynan quralyp, turaqty tolyqtyrylyp turady. Alaıda, olardyń jumsalýy, ıaǵnı, keńseler men kólikterdi ustaý, syıaqylar men bonýstardyń qalaı bólinýiniń barlyǵy qoǵamǵa da, Parlamentke de jumbaq. Sondaı-aq, olardyń qandaı tabys taýyp jáne ony qalaı ustaıtyndaryn da eshkim bilmeıdi. Dál osy jerde júıeli zańbuzýshylyq oryn alyp, jemqorlyq tamyryn jaıýda jáne memleket esebinen esh shekteýsiz baıý kózine aınalǵan. Shyǵynǵa belshesinen batyp jatsa da, menedjerler ózderine mıllıondaǵan syaıqy bólip, búkil halyqtyń moınyna júkteletin syrtqy qaryzdyń qomaqty bóligin qalyptastyrýda. Sondyqtan, kvazımemlekettik mekemeniń bıýdjetin qoǵam men Parlamenttiń qadaǵalaýyna qaıtarý – óte mańyzdy shara», - dedi depýtat.
Onyń paıymynsha, olaı bolmasa, Parlament pen qoǵam ekonomıkamyzdyń baqandaı alpys paıyz tabysyn kóre almaı otyr.
«Bul jerde áńgime eldiń aýyzyndaǵy «Samuryq-Qazynada» ǵana emes. Bular – «Báıterek qory» jáne mınıstrlikter men ákimshilikterdiń mańaıyna úımelegen «SQ-Farmatsııa» qory, «Parasat» holdıngi, SPK sııaqty qaptaǵan RGP, AO jáne TOO-dan aıaq alyp júrý múmkin emes. Negizinde, SPK degenimiz – aımaqtar deńgeıinde qurylǵan sol «Samuryq-Qazynanyń» túri. Olar shaǵyn orta bıznesti qoldaý úshin, áleýmettik azyq-túlik baǵasyn turaqtandyrý úshin qurylǵan bolatyn jáne olarǵa bıznes pen memleket qansha qarjy shyǵyndandy. Alaıda, bul qurylymnan «paıda bar ma», osyny saraptaıtyn kez kelgen sııaqty. Olardyń bıýdjetteri, shyǵystary men kiristeri tolyǵymen ashyq bolyp, respýblıkalyq jáne jergilikti bıýdjetterge kirgizip, al olardyń basshylyǵy shyǵystar men jetken jetistikteri týraly qoǵam aldynda esep berýi tıis», - dedi Berik Dúısenbınov.
Depýtattyń sózine qaraǵanda, ekinshi rezervtiń kózi – mindetti «jınaqtaýshy», «saqtandyrý» nemese «múshelik jarna» dep atalatyn azamattar men kásipkerliktiń shyn máninde qosymsha salyqtarǵa aınalyp ketken mindetti tólemderi. Medıtsınalyq jáne áleýmettik saqtandyrý qory qarajatynyń tulǵasyz paıdalanylýy men Biryńǵaı jınaqtaýshy zeınetaqy qorynyń mańaıyndaǵy jıi bolatyn daýlardy eskersek, osy qorlardy basqarý, olardyń shyǵystary men syıaqylary da Parlamenttiń ashyq talqylaýy men baqylaýynda bolýy tıis.
«Osyǵan baılanysty «Aq jol» fraktsııasy memlekettik bıýdjetke barlyq kvazımemlekettik mekemelerdiń bıýdjetteriniń ashyqtyǵy boıynsha arnaıy taraý engizip, basshylaryn qoǵam aldynda óz shyǵyndaryn dálel keltire otyryp qorǵaýdy jáne jumys nátıjesi týraly esep berýdi mindetteýdi usynady», - dedi ol.