Qujatsyz mal tasymaldaǵandarǵa 8 mln teńgeden astam aıyppul salyndy – Almaty oblysy
Almaty oblysynyń tártip saqshylary tıisti qyzmettermen birlese otyryp oblys aýmaǵynda qajetti qujattary joq mal tasymaldaýdyń 656 deregin anyqtaǵan. Atalǵan derekter boıynsha 277 materıal toltyrylǵan. Zań talaptaryn oryndamaǵan júrgizýshilerge 8 mıllıon 92 myń teńgeniń aıyppuly salyndy.
Oblystyq polıtseıler mal urlyǵynyń aldyn alý maqsatynda mal jáne et ónimderin tasymaldaýdy qatań baqylaýǵa aldy. Respýblıkalyq jáne oblystyq mańyzy bar joldar boıynda posttar qoıylyp, tasymaldaýǵa tıisti qujattar jiti tekseriledi.
«Eńbekshiqazaq aýdanynda mal tasymaldaýshynyń tıisti qujattaryn tekserý barysynda maldyń qujattary kúdik týdyryp, polıtsııa qyzmetkerleri mal urlyǵyn kásip qylǵan qylmystyq topty ustady. 5 adamnan turatyn barymtashylar tobynan 40 jylqy tárkilendi»,- dep atap ótti polıtseıler.
Sonymen qatar, atalǵan top ókilderiniń mal urlyǵynyń 18 deregine qatysy bary anyqtaldy. Onyń 5 faktisi aýyr qylmystar sanatyna jatqyzyldy.
Tártip saqshylary ózgeniń malyn qoldy qylǵan tulǵalardy anyqtaýǵa baǵyttalǵan «Mal urlyǵy» jedel aldyn alý is-sharasyn alty márte ótkizip, 237 qylmysty áshkere qylǵan. Onyń 102 deregi buǵan deıingi jyldary jasalǵan qylmystar ekenin atap ótý qajet.
Polıtseıler aqparatyna sáıkes, osyndaı aldyn alý sharalary arqyly oblystaǵy mal urlyǵy 20 paıyzǵa tómendep, byltyrǵy jylmen salystyrǵanda qylmysty ashý kórsetkishi 11 paıyzǵa artqan.