Qujat alý úshin HQO-ǵa kelgen atyraýlyqtarǵa syılyq úlestirildi

ATYRAÝ. QazAqparat – Búgin Atyraýda Halyqqa qyzmet kórsetý ortalyqtaryna kelgen azamattar syılyq aldy, dep habarlaıdy QazAqparat tilshisi.

«Azamattarǵa arnalǵan úkimet» memlekettik korporatsııasy» KeAQ Atyraý oblysy boıynsha fılıalynyń basyshysy Musa Haırýllıevtiń aıtýynsha, Halyqqa qyzmet kórsetý ortalyqtaryna daıyn qujat alýǵa kelgenderge memlekettik rámiz atrıbýty bar jalaýsha men táttiler berý sheshimi qabyldanǵan.

«Bıyl Memleket basshysynyń Jarlyǵymen Respýblıka kúni qaıtadan atalyp ótiledi. Osyǵan oraı merekelik aktsııa ótkizýdi kózdedik. Maqsatymyz – el birligin nyǵaıtý, ulttyq merekeni qoldaý, otandastarymyzdyń patrıottyq sezimin oıatý. Búgin jeke kýálik pen tólqujat, týý týraly kýálikti alýǵa kelgen azamattarǵa táýelsiz eldiń jalaýshasy men «Qazaqstan» shokolady berildi», - deıdi Mýsa Haırýllıev.

Búgin túske deıin 1 myńnan astam tátti úlestirilgen. Aktsııa búgin keshke deıin jalǵasady.

«Mereke kúnderine baılanysty senbide Halyqqa qyzmet kórsetý ortalyqtary ádettegi jumys kestesi boıynsha 18:00-ge deıin, al kezekshi HQO-lar 20:00-ge deıin jumys isteıdi. 24 qazan kúni tek kezekshi jáne mamandandyrylǵan HQO-lar qyzmet kórsetedi. Bul kúni qyzmet alýshylar saǵat 9:00-den 13:00-ge deıin qabyldanady. Barlyq ortalyqtar 26 qazannan ádettegi keste boıynsha jumys isteýge kóshedi», - dep málim etti Mýsa Haırýllıev.

Eske sala ketelik, budan buryn Atyraý turǵyndary 25 qazanda qoǵamdyq kólikte tegin júretinin jazǵan bolatynbyz.