Kúzgi áskerge shaqyrý naýqany bastaldy
«Qazaqstan Respýblıkasynyń Prezıdenti Qasym-Jomart Toqaevtyń «Áskerı qyzmettiń belgilengen merzimin ótkergen merzimdi áskerı qyzmettegi áskerı qyzmetshilerdi zapasqa shyǵarý jáne Qazaqstan Respýblıkasynyń azamattaryn 2022 jylǵy naýryz-maýsymynda jáne qyrkúıek-jeltoqsanynda merzimdi áskerı qyzmetke kezekti shaqyrý týraly» 2022 jylǵy 4 naýryzdaǵy Jarlyǵyna sáıkes, 1 qyrkúıekten bastap elimizde kúzgi áskerge shaqyrý kezeńi bastaldy»,-delingen habarlamada
Ondaǵy málimetterge sáıkes, oblystyq, qalalyq jáne aýdandyq shaqyrý komıssııalary jergilikti atqarýshy organdar ákimderi orynbasarlarynyń basshylyǵymen jumysqa kirisip ketti. Áskerge shaqyrý naýqany 31 jeltoqsanǵa deıin jalǵasady.
Aldaǵy tórt aı ishinde Qarýly kúshterdiń, basqa da áskerler men áskerı quralymdardyń qatary 18-27 jas aralyǵyndaǵy 18 myńǵa jýyq jańa býynmen tolyqpaq. Onyń ishinde 8 myńǵa jýyq jas Qarýly kúshterdiń qataryna qosylyp, 6 myńnan astam bozbala Ulttyq ulanǵa, 3 myńnan astam adam Ulttyq qaýipsizdik komıtetiniń Shekara qyzmetine, 300-deı jas Tótenshe jaǵdaılar mınıstrliginiń bólimshelerine jáne 100-ge jýyq azamat Memlekettik kúzet qyzmetine shaqyrylady.
Áskerge shaqyrý SMS-habarlamalar nemese úıine jáne jumys oryndaryna derbes shaqyrtý qaǵazdaryn jiberý arqyly júzege asyrylatyn bolady. Bul sharalardy jergilikti atqarýshy organdar uıymdastyryp, onyń iske asýyn qamtamasyz etedi. Oblys, qala, aýdan ákimderiniń orynbasarlary áskerge shaqyrý komıssııalaryn basqarady. 7 qyrkúıekten bastap jańa quramalar jınaý pýnktterinen áskerı bólimderge jiberiletin bolady.