Kúzgi jaýyn-shashynǵa qaramastan, egin shyǵynsyz jınaldy – mınıstr
«Bıyl elimizde jalpy egis alqaby 23,3 mln ga qurady, onyń ishinde 16,7 mln ga jerge dándi-daqyl egildi. Kúzgi jaýyn-shashynǵa qaramastan, egin shyǵynsyz jınaldy. Búginde egis pen dándi daqyldardy jınaý aıaqtaldy, qazir júgerini jınaý jalǵasýda. Dándi-daqyldyń 99,7%-y jınaldy. Bıyl egistiń ortasha ónimdiligi 16 ts/ga qurap, 26,5 mln tonna astyq bastyryldy. Joǵary ónimdilikke qolaıly aýa raıy men agrotehnologııalardy durys qoldaný, ıaǵnı sapaly tuqymdardy paıdalaný, mıneraldy tyńaıtqyshtardy engizý jáne ósimdikterdi tıimdi qorǵaý arqyly qol jetkizildi», - dedi Aıdarbek Saparov Úkimet otyrysynda.
Mınıstrdiń aıtýynsha, bıylǵy naýqanda Qyzylorda, Túrkistan jáne Jetisý oblystarynda joǵary kólemde egin jınaldy.
«Astyq egetin óńirler arasynda eń joǵary ónim jınaý kórsetkishi Soltústik Qazaqstan oblysynda tirkeldi, munda ortasha ónimdilik 18,6 ts/ga qurady. Odan ári Aqmola oblysynda – 14,1 ts/ga, al Qostanaı oblysynda – 14 ts/ga egis jınaldy. Atalǵan óńirlerde agrotehnıkalyq is-sharalardy qatań saqtaıtyn kishi sharýashylyqtardyń ózderi de ortasha deńgeıden joǵary ónim aldy. Mysaly, Soltústik Qazaqstan oblysynyń Jambyl aýdanyndaǵy «Aq-Jer 210» sharýa qojalyǵy 42,5 ts/ga bıdaı jınady. Qostanaı oblysynda «Sarykol Agro» sharýa qojalyǵy 40 ts/ga ónimdilikke qol jetkizdi. Sondaı-aq Aqmola oblysynyń Sandyqtaý aýdanyndaǵy «Svobodnoe» sharýa qojalyǵy 35 ts/ga ónim aldy», - deıdi ol.