Kúzembaevtar otbasylyq ansambli: Dástúrli ónerdi ulyqtaýshylarǵa kóńil bólinse eken

NUR-SULTAN. QazAqparat – Mańǵystaýlyq erli-zaıypty Sambaı Ilamanov pen Salıma Bazarbaeva - óner adamdary. Olardyń óneri atalǵan óńir halqyna keńinen tanymal. Búginde keıipkerlerimiz otbasylyq ansambl quryp, ulttyq ónerdiń damýyna bir kisideı úles qosyp júr. Osy oraıda QazAqparat tilshisi Kúzembaevtar januıalyq ansambliniń múshesi Salıma Bazarbaevany áńgimege tartty.

«Joldasym ekeýmiz - Mańǵystaý oblysynyń týmasymyz. Joldasymnyń aty-jóni Sambaı Ilamanov. Qazir Túpqaraǵan aýdany Aqshuqyr aýylynda turamyz. 4 balamyz bar. Bizdiń januıalyq ansambl 1986 jyly qurylǵan. Negizin atamyz qalaǵan jáne ol Ilamanovtar januıalyq ansambli dep ataldy. Mine, sol otbasylyq dástúrdi áli kúnge deıin jalǵastyryp kelemiz. Joldasym ekeýmizdiń án aıtyp, sahnaǵa shyǵa bastaýymyz 2000 jyldardyń basymen tuspa-tus keledi. Ol kezde joldasym ishki ister organynda qyzmet etti, sodan Naýryz, basqa da mereke kezinde kontsertterge qatysyp, halyq aldyna shyǵa bastadyq. Ýaqyt óte kele aýyldyq, aýdandyq, oblystyq, odan qaldy respýblıkalyq túrli mádenı is-sharalarǵa qatystyq. Jetistikterimiz de barshylyq. 2003 jyly ІІM uıymdastyrýymen ótken baıqaýǵa qatysyp, bas júldege ıe boldyq, 2007 jyly «Úzdik jubaılar» degen oblystyq baıqaýdyń jeńimpazy atandyq, sol sııaqty 2015 jyly «Mereıli otbasy» respýblıkalyq baıqaýyna qatysyp, 2 oryndy ıelendik», - dedi Kúzembaevtar januıalyq ansambliniń múshesi Salıma Bazarbaeva.

Búginde Ilamanovtar ansambliniń ataýy Kúzembaevtar januıalyq ansambli dep ózgergen.

«Ilamanovtar ansambli halyq rızashylyǵy men ataǵyna ıe bolǵan soń, biz Kúzembaevtar degen januıalyq ansambl qurdyq. Onyń ústine buǵan deıin Beıneý aýdanynda turdyq, keıin Túpqaraǵan aýdanyna kóshken soń jańa ataýmen bastaýdy jón kórdik. Bizdiń ansambldiń quramynda 7 adam bar. Bárimiz de túrli mýzykalyq aspapta oınap, án aıtamyz. ıAǵnı, dombyra, baıan, fortepıano,Yamaha jáne taǵy basqa aspaptar. Aýdandyq ákimdik pen mádenıet basqarmasy qoldaý kórsetip jatady. Otbasylyq óner ujymy bolǵandyqtan kontsertterge úıde júrip te daıyndala beremiz», - deıdi ol.

Sondaı-aq, mańǵystaýlyq jerlesimiz memleket tarapynan dástúrli ónerge nazar aýdarylyp, qoldaý kórsetilse degen pikirin alǵa tartty.

«Men Aqshuqyr aýyldyq mádenıet úıiniń dırektorymyn. Bizdegi buryn bekitilgen jumystyń shtattyq kestesi áli kúnge deıin ózgergen emes. ıAǵnı, shtatta oryn az, dástúrli ánshi, dástúrli termeshi, jyrshylarǵa turaqty jumys orny qarastyrylmaǵan. Osy oraıda dástúrli ónerdi ulyqtaýshylarǵa kóńil bólinse eken deımiz. Júrgen jerimde osy usynysty únemi aıtyp ta júremin. Óıtkeni dástúrli ánshi, jyrshy, termeshiler halyqtyń suranysyna ıe, olardy qoldaý qajet», - deıdi ónerpaz.