Kúzden beri 17 myń oqýshy men stýdent qarjylyq saýattylyq boıynsha dáris alǵan

ASTANA. QazAqparat – Bıylǵy oqý jylynda eldegi 300-ge jýyq mektep pen 34 joǵary oqý ornynyń, 40 kolledjdiń 17 myń shákirti qarjylyq saýattylyq boıynsha dáris alǵan, dep habarlaıdy QazAqparat tilshisi.

«Bıylǵy oqý jylynda mektepter men ýnıversıtetterde Qarjy monıtorıngi agenttiginiń aýmaqtyq departamentterindegi qyzmetkerler alǵash ret «Qarjylyq qaýipsizdik» dáristerin ótkizip, jastarǵa qarjylyq qylmys salasyndaǵy eń ózekti qoǵamdyq máselelerdi tanystyrdy.

Oqý jylynyń basynan beri 17 myńǵa jýyq oqýshy men stýdent qamtyldy, olardyń ishinde 300-ge jýyq mektep, 34 joǵary oqý orny, 40 kolledj bar. Oqý jylynda qarjylyq qylmys túrleri men tásilderi týraly, onyń ishinde zamanaýı aqparattyq tehnologııalardy, blokcheınder men krıptovalıýtalardy qoldaný arqyly taqyryptyq sabaqtar serııasy josparlanǵan», - dedi Qarjy monıtorıngi agenttiginiń kadrlyq jumys departamentiniń dırektory Nurlan Adalıev.

Onyń paıymynsha, osyndaı is-sharalar arqyly úlken ómirge qadam basatyn jas qazaqstandyqtar ekonomıkalyq jáne qarjylyq qaýipsizdik salasynda asa qajetti tájirıbe jınaıdy.