Kúzde kómir tapshylyǵy bolmaýy úshin ne isteý kerek - QTJ ókili óz usynysyn aıtty

NUR-SULTAN. QazAqparat – «Samuryq Qazyna» aqparat alańynda ótken brıfıngide «Qazaqstan temir joly» UK» AQ basqarma tóraǵasynyń orynbasary Oralhan Qulaqovqa kúzde kómirge qatysty qarbalas bolmaýy úshin qandaı shara qabyldanyp jatqany jóninde saýal qoıyldy, dep habarlaıdy QazAqparat tilshisi.

«Bul jerde másele maýsymdyq tasymal týraly aıtylyp otyrsa kerek. Ádette tamyzdyń aıaǵynan bastap kómir men astyq tasymaly 30-35, tipti keıde 40 paıyzǵa deıin artady. Bul kezeńge biz de barynsha daıyndalamyz. Óz baıandamamda aıtqanymdaı, qolda bar jyljymaly quram el ishindegi tasymaldy ýaqtyly qamtamasyz etýge jetkilikti. Biraq tasymal jyl boıynda naqty belgilengen yrǵaqpen uıymdastyrylýy kerek. Úsh aılyq kólemdi bir aıda jóneltse, árıne, keptelis bolady. Al josparlap, sol boıynsha tasymaldansa, vagondar jetkilikti. Tasymaldyń naqty yrǵaqpen uıymdastyrylýy tıeýshilerge ǵana emes qabyldap alýshylarǵa da qajet», - dedi QTJ ókili.

Onyń aıtýynsha, búginde temirjol arqyly júk tasymaldaý naryǵynda barynsha ashyq júıe qalyptasqan. «QTJ» monopolııasy barynsha azaıtylǵan.

«Men bul jerde tasymaldaýshy quramdy QTJ-nyki nemese jeke tasymaldaýshylar dep bólip otyrǵan joqpyn. Qolda bar vagondar parki dep bárin qosyp aıtyp otyrmyn. Bizdiń «Qaztemirtranstyń» ıelegindegi jartylaı ashyq vagonardyń úlesi búkil parktiń 40 paıyzyna da jetpeıdi. Al jabyq vagondardyń jalpy quramdaǵy úlesi 40 paıyzdan sál asady. ıAǵnı, naryqta barynsha ashyq júıe qalyptasqan», - dedi ol.