Kúzde 7 myńǵa jýyq sarbaz zapasqa shyǵarylady

ASTANA. QazAqparat – QR Prezıdentiniń 2022 jylǵy 4 naýryzdaǵy Jarlyǵyna sáıkes, Qarýly kúshterde áskerı qyzmettiń belgilengen merzimin ótkergen 7 myńǵa jýyq sarbaz bıylǵy kúzde zapasqa shyǵarylady, dep habarlaıdy QazAqparat.

QR Qorǵanys mınıstrliginiń baspasóz qyzmetinen málim etkendeı, bir jylda myńdaǵan sarbaz áskerı istiń qyr-syryn úırenip, bólimsheler quramynda jattyǵýlarǵa qatysty. Kóptegeni oqý-jattyǵý ortalyqtary men kishi mamandar daıarlaıtyn mektepterde aldaǵy ómirine qajet bolatyn áskerı mamandyqtar alyp shyqqan.

Barlyq áskerı bólimde saltanatty sharalar uıymdastyryldy, sarbazdar Jaýyngerlik týmen qoshtasyp, platsta sońǵy ret sap túzep júrip ótti. Al komandırler men jeke quram zapasqa shyǵarylǵan merzimdi qyzmettiń sarbazdaryna qurmet kórsetýde. Úzdikteri gramotalarmen, baǵaly syılyqtarmen, alǵys hattarmen marapattaldy.

«Týǵan jerlerine kelgennen keıin zapasqa shyǵarylǵan áskerı qyzmetshiler jergilikti áskerı basqarý organdarynda áskerı daıyndalǵan rezerv retinde esepke alynady», - delingen vedomstvo málimetinde.