Kúıshi: Qazaqtyń qara dombyrasynyń arqasynda álemniń talaı elin araladym

ÓSKEMEN. QazAqparat – Shyǵys Qazaqstan oblysy Abaı aýdanynda dúnıege kelgen Daryn Qudaıbergen kúmbirletip kúı shertip, áýeletip án aıtyp, tyńdarmannyń talǵamynan shyǵyp júrgen ónerpazdardyń biri. Talaı respýblıkalyq, halyqaralyq baıqaýlardyń jeńimpazy atanǵan ol dombyrany qolǵa alyp, álemniń túkpir-túkpirinde óner kórsetken. QazAqparat tilshisi Ulttyq dombyra kúnine oraı kúıshimen habarlasyp, azyraq suhbat qurǵan edi.

- Dombyraǵa degen qyzyǵýshylyǵyńyz qalaı oıandy?

- Áke-sheshem dástúrli ánshi bolǵandyqtan es bilgeli ulttyq aspaptyń únin estip kelemin. Alty jasymnan bastap dombyra shertýdi úırendim. 9-ǵa kelgende úıirmege jazylyp, uztazdardyń tálimin aldym.

Mektepte birinshi synyptan beri túrli kontsertterde óner kórsettik. Al 5-shi synyptan konkýrstarda baq synaı bastadym.

- Eń alǵash qandaı baıqaýda jeńimpaz atandyńyz?

- 2008 jyly Semeıdegi qalalyq baıqaýǵa qatysqanymda bas júlde buıyrdy. Sodan keıin oblystyq baıqaýǵa joldama alyp, birinshi oryndy ıelendim. 2009 jyly respýblıkanyń kil úzdikterimen baq synasyp, birinshi oryndy qanjyǵama baıladym.

Osydan keıin shabytym ashylyp, kúıshilerdiń túrli saıystarynan qalys qalmaýǵa tyrystym. Mundaı jarystar odan saıyn shyńdala túsýińe mol áser etedi. 2016 jyly alǵash ret halyqaralyq baıqaýda baq synadym.

Elordada uıymdastyrylǵan bul sharada úzdik atandyq. Sondaı-aq 2019 jyly Jezqazǵan qalasynda ótken Ketbuǵa jyraý atyndaǵy «Aqsaq qulan» halyqaralyq baıqaýynda da óner kórsetken edim.

Qyrǵyzstan, Qaraqalpaqstan, Túrikmenstan, Qytaı men Monǵolııadan kúıshiler kelgen jarysta bas júlde alýym men úshin úlken mártebe boldy. 1 mln teńge aqshalaı syılyq ta berildi.

- Repertýaryńyzda qansha kúı bar? Onyń ishindegi súıikti kúılerińizdi atap ótseńiz.

- 200-ge jýyq kúı shertemin. Biraq «mynaý meniń súıikti kúıim» dep onyń eshqaısysyn bólip-jara almaımyn. Ózim kúı shyǵaryp ta kórgen emespin. Kúı ǵana shertpeı, halyq ánderin de aıtamyn.

- Ózińiz úlgi tutatyn kúıshiler bar ma?

- Árıne. Ónerin erekshe baǵalaıtyn kúıshilerim – Rysbaı Ǵabdıev, Qarshyǵa Ahmedııarov jáne General Asqarov.

- Álemniń qaı elderinde óner kórsettińiz?

- Tórtkil dúnıe elderiniń halqy tól aspabymyzǵa erekshe qyzyǵýshylyq tanytady. Buǵan shetelge shyqqanda kózim anyq jetti. Ál-Farabı atyndaǵy Qazaq ulttyq ýnıversıtetiniń «Shabyt» dombyrashylar ansambli quramynda Nıý-Iork, Vashıngton, Parıj, London, Berlın, Praga, Býdapesht, Shopron syndy álemdik shaharlarda jáne Qytaı men Reseıdiń túrli qalalarynda óner kórsettik.

«Adaı», «Álqıssa», «Balbyraýyn», «Saryarqa» syndy tanymal kúılerdi oryndadyq. Halyqtyń bizge degen iltıpaty, qoshemeti keremet boldy.

- Aldaǵy josparlaryńyz qandaı?

- Qazirgi ýaqytta Nur-Sultan qalasy ákimdiginiń fılormonııasyndaǵy «Saryarqa» folklorlyq ansambliniń artısi bolyp jumys isteımin. Kúıshi retinde ózimdi ary qaraı damyta bergim keledi.

Qazaqtyń qara dombyrasynyń arqasynda óz ornymdy taptym, álemniń talaı elin sharladym. Ulttyq aspapqa degen mahabbatym eshqashan sónbeıdi. Óle-ólgenshe dombyrany qolymnan tastamaımyn.

- Áńgimeńizge kóp rahmet!