Kúıeýimniń qasyna mindetti túrde kútip otyratyn adam kerek – Semeıde jaraqat alǵan muǵalimniń áıeli

<p>SEMEI. KAZINFORM &ndash; Semeıde shyrshany bezendirip jatyp jaraqat alǵan muǵalimniń áıeli kúıeýiniń qazirgi jaǵdaıy qalaı ekenin aıtyp berdi.</p>

Qýat Aıtqalıev Semeıdegi №49 mekteptiń qazaq tili jáne ádebıet pániniń muǵalimi bolyp jumys isteıdi. 21 jeltoqsanda ol ortalyq alańdaǵy jańajyldyq shyrshany bezendirý kezinde qulap, jaraqat alǵan.

Sol kezde Oqý-aǵartý mınıstri Ǵanı Beısembaev bul jaǵdaıdy jeke baqylaýyna alyp, mundaı áreketterdiń QR «Pedagog mártebesi týraly» Zańyn óreskel buzatynyn aıtty.

- Muǵalimderdi kásibı qyzmetine qatysy joq jumystarǵa tartýǵa tyıym salynady. Tergeý amaldary talapqa saı júrgizilip, osyndaı jaǵdaıdyń qaıtalanbaýy úshin tıisti sharalar qabyldanady dep senemiz, - dedi mınıstr.

Kóp uzamaı ustazdyń jaraqat alýyna baılanysty qalalyq bilim bóliminiń basshysy Birjan Bulabaev qyzmetinen bosatylyp, qala ákiminiń orynbasary Araıbek Hamzaevqa sógis jarııalandy.

8 qańtarda Qýat Aıtqalıevtiń aýrýhanadan shyǵarylǵany habarlandy. Osyǵan oraı Kazinform agenttiginiń tilshisi muǵalimniń áıelinen kúıeýiniń qal-jaǵdaıyn surap kórdi.

- Jubaıym shyrsha bezendirip jatqanda bıikten qulap, basynan aýyr jaraqat alǵan. Qazir aýrýhanadan shyǵyp, úıde jatyr. Biraq mindetti túrde qasyna kútip otyratyn adam kerek. Ózim qarap otyrmyn, biraq men jumysqa ketkende anam qaraıdy, - deıdi Symbat Aıanqyzy.

Onyń aıtýynsha, búginde tergeý amaldary áli aıaqtalǵan joq.

- Biz kináliler jazasyz qalmasyn deımiz. Bári zań sheńberinde bolsyn. Tergeý aıaqtalyp, naqty kim kináli ekendigi belgili bolǵan soń ony sotqa berip, ótemaqy talap etemiz. Biraq ázirge ótemaqy somasyn aıta almaımyn. Ony zańgermen birge esepteımiz, - deıdi Symbat Aıanqyzy.

Eske salsaq, osyǵan deıin Semeıde jaraqat alǵan muǵalimge ómir boıy ótemaqy berý usynylǵany habarlanǵan.