Kúıeýiniń kóńildesin pyshaqtap óltirgen: Astanada sot úkim shyǵardy

ASTANA. QazAqparat – Búgin elordadaǵy Almaty aýdanynyń №2 aýdandyq soty Qylmystyq kodekstiń «Abaısyzda kisi óltirý» baby boıynsha aıyptalǵan astanalyq kelinshekke qatysty isti qarady, dep habaraıdy QazAqparat tilshisi.

Astana sotynan málim etkendeı, psıhıkalyq kúızelis jaǵdaıynda bolǵan aıyptalýshy janjal kezinde kúıeýiniń kóńildesine pyshaq salǵan.

«Jábirlenýshi M. aıyptalýshy R.-nyń kúıeýimen nekege deıin qarym-qatynasta bolǵan jáne olardyń ortaq bir balasy bar. Aıyptalýshy R.-nyń kúıeýi resmı nekege turǵannan keıin de jábirlenýshi M.-men qarym-qatynasyn úzbegen. Keıin jábirlenýshi M. kezekti ret aıyptalýshynyń úıiniń aýlasyna kelgen ýaqytta, ol jubaıymen birge syrtqa shyǵyp, onyń arty janjalǵa ulasqan. Sol sátte aıyptalýshy R. jábirlenýshi M.-nyń tarapynan jıi jasalǵan qorqytý, qorlaý saldarynan týyndaǵan kúızelis (affekt) jaǵdaıynda oǵan pyshaq suqqan. Saldarynan jábirlenýshi aýrýhanada kóz jumdy», - delingen habarlamada.

Taraptar tatýlasý týraly medıatıvti kelisimge kelgen. Oǵan sáıkes, zardap shekken tarap moraldyq jáne materıaldyq shyǵyndy óteý boıynsha shaǵym bildirmeıdi.

Sotta aıyptalýshy óz kinásin tolyq moıyndaǵan. Sondaı-aq kýágerlerdiń aıǵaǵy, oqıǵa ornynan túsirilgen beınejazba, saraptamalar dálel retinde tirkeldi.

Sot kináni jeńildetetin mán-jaı retinde kelinshektiń bir jasar balasynyń bolýyn jáne kinásin tolyq moıyndaǵanyn eskerdi.

Nátıjesinde sot aıyptalýshy R.-ǵa probatsııalyq baqylaý taǵaıyndaı otyryp, 1 jyl 6 aıǵa bas bostandyǵyn shekteý úkimin shyǵardy. Sheshim zańdy kúshine engen joq.