ShQO-lyq zerger kúmisten qazaqy naqyshtaǵy áshekeıler jasaıdy

<p>ÓSKEMEN. KAZINFORM &ndash; Shyǵys Qazaqstan oblysy Samar aýdanynda turatyn Oralbek Bekqalı kúmisten túrli buıym jasaıdy. Barlyǵyn tek qol eńbegimen daıyndap, arnaıy apparat qoldanbaıdy. Ásirese onyń qazaqy oıý-órnek qosylǵan áshekeılerine qyzyǵatyndar kóp.</p>

Oralbek Bekqalı Qytaı Halyq Respýblıkasynyń Altaı qalasynan Shyǵys Qazaqstan oblysyna 20 jyl buryn qonys aýdarǵan. Qazir Samar aýylyndaǵy mektepte eńbek páninen sabaq beredi. Almatydaǵy Abaı atyndaǵy Qazaq ulttyq pedagogıkalyq ýnıversıtetiniń kórkemsýret fakýltetin támamdaǵan. Sol kezde dıplomdyq jumysy zergerlik óner taqyrybyna qatysty boldy. 

Foto: Keıipkerdiń jeke muraǵatynan

— Ákem de, atam da ustalyqpen aınalysqan. Zergerlik jumysqa bala kúnimnen qyzyǵatynmyn. Buıymdardy kúmisten jasaımyn. Ázirge altyn qoldanyp kórmedim. Negizgi maqsatym — ulttyq naqyshta buıym jasap, babalar murasyn jalǵaý, — dedi zerger.

Alqa, bilezikten bastap, kólemdi buıymdardy da jasaıdy. Jasaıtyn zattaryna melhıor atalatyn metaldy qoldanady. Bul kúmis pen myryshtyń qosyndysy. Baǵasy kúmiske qaraǵanda arzanyraq. 

— Buǵan tabys kózi retinde qaramaımyn. Hobbı desem de bolady. Jalpy, zergerlikpen úzdiksiz aınalysyp kele jatqanyma segiz jyldan asty. Sýretshiligim de bar. Zerger men sýretshiniń arqalaıtyn júgi bir. Ekeýi de qol óneri men naqtylyqty talap etedi, — dedi Oralbek Bekqalı. 

Buıymdardy jasaýǵa ketetin ýaqyt ártúrli. Máselen, erlerge arnalǵan belbeýdi jasaýǵa jarty aı jumsaǵan.

— Eskızin daıyndaýda muqııat bolý kerek. Qazaqy oıý-órnek mindetti túrde qosylýy tıis. Buıym minsiz shyqsyn desek, oıda ábden pisirgen jón. Buıym jasaýda eń uzaq degende bir aı ýaqytym ketti. Barlyǵy tek qol eńbegimen daıyndalady, arnaıy apparat qoldanylǵan joq. Ýaqyttan utylmas úshin aldaǵy ýaqytta jartylaı avtomattandyrýǵa kóshýdi josparlap otyrmyn, — deıdi ol. 

Jasalǵan áshekeılerdiń baǵasy kúmistiń salmaǵymen esepteledi. Sońǵy ýaqytta qyzdarǵa arnalǵan alqa-monshaqtarǵa tapsyrys jıilegen.

— Naqty bir qatyp qalǵan baǵa joq. Tabıǵı taza tastar men kúmis qoldanylsa, jóni bólek. 7000 teńgeden bastalyp, qymbaty 200 myń teńgege deıin barady. Samar aýdany kóleminde tapsyrys tússe, oıýlap, ásemdep daıyndap beremin, — dedi zerger.