Kútimsiz joldan zardap shekken Oral turǵyny zalaldy ákimdikten óndirdi

<p>ORAL. AZINFORM &ndash; Oral qalasynyń № 2 sotynda A. degen turǵynnyń talap aryzy boıynsha azamattyq is qaraldy.</p>

BQO sotynyń baspasóz qyzmetinen málim etkenindeı, atalǵan azamat Oral qalasy turǵyn úı-kommýnaldyq sharýashylyǵy, jolaýshy kóligi jáne avtomobıl joldary bóliminen jol-kólik oqıǵasy saldarynan keltirilgen materıaldyq shyǵyndy óndirý týraly talap etken.

Talapker 2024 jyldyń naýryz aıynda Dáýletkereı men M.Lermontov kósheleriniń qıylysynda joldy kútip ustamaý saldarynan paıda bolǵan tereń shuńqyrǵa avtokóligimen túsip ketken. Shuńqyr erigen qar sýynan kórinbegen. Atalǵan derek boıynsha jaýapkerdiń kinási ákimshilik quqyq buzýshylyqtar jónindegi mamandandyrylǵan sotynyń qaýlysymen aıqyndalyp, ákimshilik jaýapkershilikke tartyldy.

Talapker jaýapkerdiń kinási anyqtalǵanyn alǵa tartyp, sottan avtokólikti jóńdeýge jumsalǵan 605 080 teńge shyǵyn men zalaldy baǵalaýǵa ketken 60 myń teńgeni óndirýdi surady.

- Sot is materıaldaryn zerttep, jaýapkerdiń kinási ákimshilik sottyń qaýlysymen tolyqtaı anyqtalǵandyqtan, talapkerdiń paıdasyna atalǵan bólimnen 605 080 teńge materıaldyq zalal men 60 myń teńge baǵalaý somasyn óndirdi. Sheshim zańdy kúshine endi, - dep habarlady vedomstvodan.

Eske sala keteıik, budan buryn Oralda sotqa qurmetsizdik tanytqan polıtsııa qyzmetkeriniń jaýapqa tartylǵanyn jazǵan bolatynbyz.