Qutqarýshylarǵa páteraqy tólene me – vıtse-mınıstr jaýap berdi

ÓSKEMEN. QazAqparat – Búgin Shyǵys Qazaqstan oblysyna jumys saparymen kelgen QR Tótenshe jaǵdaılar vıtse-mınıstri Marat Kúldikov qutqarýshylarǵa páteraqy tóleý máselesine qatysty jaýap berdi, dep habarlaıdy QazAqparat tilshisi.

«Memleket basshysy Qasym-Jomart Toqaev azamattyq qorǵaý organdary qyzmetkerleriniń jalaqysyn arttyrý týraly tapsyrma berdi. Soǵan oraı keshendi jospar qurylyp, naqty qadamdar jasaldy. Endi eńbekaqy kólemi 10-nan 70 paıyzǵa deıingi aralyqta ósedi dep josparlanyp otyr. Bul birinshi kezekte, órt sóndirýshilerge qatysty. Naqty kelesi jyldyń basynda jalaqy artady dep kútilýde», - dedi Marat Kúldikov.

Onyń aıtýynsha, áskerıler men polıtseılerge tólenetin páteraqyny qutqarýshylarǵa da berý máselesi nazardan tys qalmady.

«Baspanasy joq qutqarýshylarǵa aı saıyn páteraqy tóleýdi keshendi josparda qarastyrdyq. Biraq áli naqty sheshilgen joq. Qarjy jáne Ulttyq ekonomıka mınıstrlikterimen keńesip jatyrmyz. Álbette, biz qutqarýshylarǵa páteraqy berilip, materıaldyq jaǵdaıynyń jaqsarýy úshin tıisti jumystardy atqaramyz», - dedi vıtse-mınıstr.