Qutqarýshylardyń ekinshi eshelony Túrkııaǵa attandy

ASTANA. QazAqparat - Qazaqstandyq qutqarýshylardyń ekinshi eshelony Túrkııadaǵy joıqyn jer silkinisi bolǵan jerge attandy, dep habarlaıdy QazAqparat TJM silteme jasap.

Buǵan deıin habarlanǵandaı,ekinshi eshelon quramynda jeke quramnan 60 adam, olardyń ishinde TJM qutqarýshylary, Apattar medıtsınasy ortalyǵynyń dárigerleri, kınologııalyq esepteri bar.

TJM jedel áreket etý kúshterinde avarııalyq-qutqarý quraldary men jabdyqtardyń 150-ge jýyq jáne dári-dármekterdiń 160-tan astam túri bar.

Jer silkinisiniń saldaryn joıý jónindegi ortalyq shtabpen kelise otyryp, Qazaqstan TJM ekinshi toby Gazıantep qalasyndaǵy izdestirý-qutqarý jumystaryna qosylatyn bolady. Túrkııaǵa tartylǵan qazaqstandyq qutqarýshylardyń jalpy sany 100 adamdy quraıdy.

Tıisti tapsyrmany Qazaqstan Prezıdenti Qasym-Jomart Toqaev berdi. Qazaqstan Túrkııaǵa shuǵyl kómek retinde 1 mıllıon dollar beredi.

Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty 12 aqpanǵa deıin jeti kúndik ulttyq aza tutý jarııalady.

Sońǵy málimet boıynsha Túrkııada zilzala qurbandarynyń sany 6,2 myńnan asty.