Qutqarýshylar úsh kún boıy habarsyz ketken aqtóbelikti tapty

AQTÓBE. QazAqparat - Aqtóbede mal izdeýge shyǵyp, adasyp ketken 35 jastaǵy er adam tabyldy. Ol úsh kún boıy dalada túnegen, dep habarlaıdy QazAqparat tilshisi.

16 sáýir kúni saǵat 18:15-te 112 qutqarý qyzmetine habar tústi.

Onda Áıteke bı aýdany Tolybaı aýylynan Jabasaq aýyly baǵytyna qaraı mal izdep shyqqan adamnyń joǵalyp ketkeni aıtylǵan.

«Bul kúnderi aýdanda daýyldy eskertý jarııalanǵan. Habarlamaǵa qaramastan er adam joǵalǵan malyn izdeýge shyqqan. Sóıtip adasyp ketken. Іzdestirý-qutqarý jumystaryna aýdandyq TJB qyzmetkerleri, polıtsııa bólimi jáne jergilikti turǵyndar jumyldyryldy. Jumys 3 kúnge sozyldy. Nátıjesinde joǵalǵan azamatty qutqarýshylar 18 sáýir kúni saǵat 10:45-te Aqsý qystaǵynan 5 km qashyqtyqtan tapty. Qutqarýshylar 35 jastaǵy er adamdy Tolybaı aýylyna jetkizdi. Jaǵdaıy turaqty, medıtsınalyq qyzmetkerleriniń baqylaýynda»,- dep habarlady oblystyq PD baspasóz qyzmeti.

Eske salsaq, ótken demalys kúnderi Aqtóbede qar jaýyp, boran boldy. Qutqarýshylar birneshe aýylda qutqarý jumysyn júrgizdi.

Sonymen birge bir sátte 7 aýdanda ondaǵan aýyl jaryqsyz qaldy.

Áli kúnge deıin oblystyq Hromtaý, Áıteke bı, Mártók, Shalqar, Qobda, Yrǵyz aýdandaryndaǵy 17 aýylda jaryq joq.